BJP thang kamah kan awk dawn!

Mizoramah hian BJP thunun (control) sorkar hi a pian theih kan ring ngai lova, tunah hian BJP sum leh chakna hman hreh lo politician an inlar ta tuau tuau mai! Tling zo dawn lo mahse BJP thang kama inpal awh hram tum hi kan ngah khawp mai tih a lang ta a ni.

Meghalaya inthlan hma khan tumahin BJP telna sorkar an neih theih an ring lova, BJP-in pawisa leh thiam thil an han vawrh a, Congress tihtlak hrim hrim tumin party hrang hrang an han bêl kual vel a, BJP (NDA) thlawptu sorkar an nei ta ruau a, Congress-in MLA an ngah ber chungin BJP thunun theih sorkar a ding a, Hindutva kal pui duhtute chu an khi vur vur asin.

BJP hi mihring ṭha tak awmna ni mah se an innghahna chu India ram hi Hindu rama siam a ni a, an thupui ber chu 'Hindutva' a ni a, India ram kil sir khata Mizo Kristian tlem tê lo awm vete tan chuan a hlauhawm hle a ni. A hlauhawm loh dan sawi a ngaih tawh chuan a hlauhawm tihna a ni mai. India rama Kristian tamna Northeast lamah hian inzar pharh an tum avangin tun hma ang lo takin 'pawisa thiltihtheihna leh po­litics mak danglam' nen an rawn rûn chho mek a. Kristian state Nagaland meuh pawh BJP hian a chim pil tawh a, Tripura leh Meghalaya lama an rawn chet ṭhat hnuah Mizorama luh an tum a, a sak ṭalh mai.

Mizoramah chuan BJP tan thil tih a la harsa a, mahse thang an kam ta a, tunah hian hmaikawr dang vuahin an che mek a ni.

BJP sum leh chakna hman hreh ang taka lang, a taka BJP nena inhne reng chu MNF an ni tih hi zêp thu a cheng lova, NEDA hnuaia awm ve ve an ni a, NEDA hi BJP siam a ni. NEDA lama an awm pui tho chu NPP (Meghalaya-a BJP kawppui) an ni. Congress MLA an hnawhchhuah tak leh Congress aṭanga inhnawh chhuah tir tuma Congress MLA ni chunga Congress beitu pawh hian BJP zawm tawp an ngam lova, MNF-a inpek pawh an tan a him loh dan a awm si a, tichuan BJP sangawizawnpui NPP nen an inrim mek a ni.

BJP hian Saitual leh a chhehvelah gas connection an sem tawh a, football inkhelte an buaipui a, ṭhalai lamah sum an chelek chho mek a, chutah Hmar mipui chen tamna lamah kua an hreuh mek bawk a. Heng hmunahte hian NPP tih hming dang invuahin BJP hi an lut dawn niin a lang. BJP - NPP - MNF chu pawn lama hrang vek si, a ruka inzawm siin an awm dawn a, an indawr ru fo tawh niin politics chanchin hre deuhte chuan an sawi tawh a ni.

"BJP thangkamah hian tu tu emaw hi chu an âwk dawn a, a ṭhen hi chu an inpal âwk lui dawn a, hmun danga an tih ang bawkin Hindutva din tumtute hian Mizoram hi lak ngei tumin thiam takin hmaikawr dang nen an veh mek," tiin local political analyst anga chhal ngam Mizoram politics hre tak chuan September 21 zana kan zanriah kilnaah a sawi a, ngaihtuah a ti thui hle a ni.

- Lalnunpuia