DISTRICT ṬHELHIN A ṬHELH!

CM thusawi hian mang a va ti ang lehzual em ve le...

Covid hmainkan beisei lo

Covid19 hri lên hma chuan kan state sum din­hmun, Central sorkar sum dinhmun beisei dan a sawi theih a, hrileng vangin 'Chung zawng zawng chu a chhe ta vek a' han tih tawp mai chuh! Hrilen hma khan kan state sum dinhmun dik tak hriat hi mipui nawlpui hian kan beisei lo. Hri a leng a, state sorkar hi ṭanpui a ngai viau em? Sorkar hnathawkte hlawh tur hi engtik thleng nge kan daih dawn? Thlai thar lamah hian engtiang taka hmalak ngai nge kan nih tih hriat nan kan state sum dinhmun hi kan hre duh ṭhup zawk a ni. 

Lokal tur kan sawi lo

CM hian thiam takin GST ah, central aṭangin, NEC aṭangin engzat nge lo lut dawn kan hre lo a tihna tluk a ni a, hei hi hri lên hma khan a tlangpui a hriat theih a, tunah chuan a hriat theih loh a tihna a ni. Mahse hei hi mipui zawhna a ni lo!

Lokal tur hriat kan tum lova, kan Budget, Budget pâwn, Covid 19 dona, Relief Fund aṭanga sum lo thleng tawh sa hi engnge kan dinhmun ni a, kan chhe viau em tih hi kan hriat duh zawk a ni. Hrilen hma pawh khan sum lo lut tur hi tuman 'Pa' chauh loh chuan a figure dik tak kan hre chuang lo. 

Hri a leng a, kan dawn chin, kan hman chhuah chin, ṭanpui kan ngaih dan chin, chhungkaw bil thlenga hmalak thiam dan tur chin hi a ni kan hriat duh! 

Finance Minister rintlak kan mamawh

Kan state sum enkawltu berin kan tlakchham leh kan phân loh thu sawi tur hre lek lova a lo lut tur hriat lawk a nih loh thu chunglam meuh hming chhala a pehhel kual reng mai hriat hian bei a ti dawng ngawih ngawih a, Finance Minister dik tak, kan sum hmuh chin leh hman ral chin hria, chuta ṭanga mipui nawlpui inven dan tur leh inrenchem dan tur zirtir thei kan mamawh hle mai. 

Min hrilh rawh

Kan sum dinhmun dik tak min hrilh rawh min ti se;

1)    Kan Budget aṭangin cheng chuti zat kan hmu tawh. 

2)    Budget paw lam, NEC leh Central Sorkar aṭangin Covid 19 do nan cheng chuti zat kan dawng tawh.

3)    Hmuh/ dawn leh tura beisei hi cheng chuti zat chu a ni.

4)    CM Relief Fund a vaibelchhe tel lo lut aṭang hian cheng chuti zat chu chumi atan kan hmang tawh a, cheng chuti zat chu kan la nei. 

5)    State sorkar hi tun din­hmunah a pachhe hle a, 

ṭanpui ngai tak kan ni. State sorkar hi kan tun dinhmun a la ṭha thawkhat a, ṭanpuina pe lo leh hlawh cut lo pawh hian kan la kal thei. 

6)    Tuna kan dinhmunah chuan sorkar hnathawkte hlawh hi May thlaah pek kim tur kan nei tawh lo. May thla pawh kan la phâng love. 

Heng point paruk lek pawh hi state khat Finance Minister ve riangruang tan chuan Pa chauh lo pawhin a hriat ngei tur a ni. Mahse kan Finance enkawltu hi tun dinhmun zirchian aia sum lo lut tur hriat chian lohna rau-in a bual mek zawk a tih theih. 

Pehhêl tawh lo se

A lo thleng tur tuma hriat lawk loh thudik awmsa hi sawi tawh lo se, a awmsaa kan dinhmun tal hi fiah fai taka sawi turin Adviser to CM, PS to Adviser to CM thleng hian ṭanpuina sum mamawh dan leh mamawh loh dan tal sawi turin kan tun dinhmunah hian lo chêntir hram se. Mimal, pawl leh chhungkua thlenga hmachhawn dan kan thiam theih nan pehhel kual lo tura advise theih nise a va ṭha ve mawle!