Kan sum dinhmun a chhiat ka ring ve lem lo

Kan Chief Minister leh kan Finance Minister ni kawp aia pawisa chungchang hre chiang tur hi Mizoramah chuan an awm lo turah ka lo ngai ve tawp mai a. Kan Chief Minister hian pawisa tamzia a sawina video hi ka hmu fo a, pawisa harsatna hi a sawi rik ka la hre lova, tunlai hian thil inti hre tak tak Mizoram pawisa harsatzia lo sawi ve phawng phawng hi an tam a. Hengho hian kan CM thusawi hi an man phak lo a nih loh pawhin kan pawisa hi an hmu thiam ve lo a nih ka ring ta rum rum mai. 

Finance Minister chu Mizoram pawisa dahnaa kan pawisa awm zat hre chiangtu a ni a, kan Finance Minister hian pawisa awm zat hre chungin Covid-19 dona atan pawisa a tam tih a sawi a, a hman zat tur pawh 'limit awm lo' tiin a sawi tawh a ni. Chu chu ringhlel ang zia zangin ṭhenkhatin Chief Minister Relief Fund an lo khawn ve thul a, sorkar pawisa ngahzia hi kan hotu lam sawi kan ngaithla fo tawh a, Covid-19 hi buaipui awm hle chung pawhin pawisa a tam tawk avangin a awm sa hian a daih dawn tih an hre chiang ni turah ka ngai ve leh hmiah mai a ni. He ngaihdan neih hi a hahdam zawk a ni, ngaihdan dang lo neih ve sek hi a sawngsaw hlawt lo a ni.

Pawisa vanzia leh kan buai tur thu hi kan Finance Minister hian a la sawi lova, chuvangin a chhevela mi tu tu emaw lo buai ve sek hi thil ṭul ber pawh a ni lova, pawisa hi a vang tak tak a nih chuan a sawitu tur ber a concerned minister hian a la rawn sawi mai dawn a ni; a rawn la puang chiang anga mipui pawhin pawisa kan thawh duh a rinawm a ni. Pawisa kawltu ni lovin a tlemzia lo sawi lo sawi ve loh tur a nih bakah a tak takin a tlem lo pawh a ni thei a, Assembly Budget Session-ah khan pawisa pass tawha tel si lo pawisa lo lut tur kha a tam lutuk a, pakhat phei kha chu a awihawm loh zawk avangin a ammount pawh sawi chhuah loh kha a la ni. Khatiang pawisa hre phak tan chuan lungphanna tur a awm lo. 

Tin Vairam angin kan buai ve tur a ni lo, a chhan chu mihring nuai 10 vel lek enkawlna tur sum hi a harsa lovang tih rin mai tur. Vairamah veng khatah mi nuai 10 aia tam awmna hi khawpui lianah chuan a tam a, an mirethei harsa zual ringawt pawh keini state aiin an tam a, chu mite enkawl ngai bawk, an Covid-19 positive te enkawl ngai bawk avanga an mangan avangin Mizoram hi lo mangan chhiat tur a ni ve lovang tih hi ka pawm dan a ni a. Kan industry hi collapse ve turin a industry tak tak kan nei phak ve chuang lova, hri len avanga kan privet sector chawl ṭhuap tur ang chi hi kan nei ve lo bawk. 

Tourism Industry leh Aviation lamah 'worst hit' a ni dawn an tih lah hi pawisa kan lak luhna a ni ve chuang lova, Sports & Entertainment Industry-in pawisa an hloh dawn an tih lah hi industry tih tham tur pawh kan nei chuang lova, mi tlem azawng chuan an tuar ngei anga mahse kan innghahna chu sorkar hnathawk hlawh leh kuthnathawktute thar chhuah a nih avangin Vai mangan avanga Mizo lo mangan hi a ṭul ve vak vak em ni? tih hi mimawl zawhna ka zawt a ni.

Vairam leh Mizoramin an loh dan chu an ni chuan buaipui tur an ngah lutuk a ni. Mirethei kutdawh pawh buai pui tham an neih sa bakah an Industrial worker a singa sing tel khuan hna an chân chuan an chhungkua nen a nuaia nuai tel chhuan chhamin an awm thei a, chu mi chawi kang tur chuan state sorkar a mangang a ni. Keini chuan chutiang kan nei ve chuang lova, sorkar hnathawkten hlawh pangngai an lak a, kan ramah ruah tui a tlak bawk si chuan kuthnathawktuten thlai leh thil dang an thar zel dawn a, buhfai ei tur ngawr ngawr hi chu Food Corporation of India lamin an rawn thawn lut zel thei dawn niin an sawi a (thar belh loh pawhin kum khat aia rei daih FCI-in buhfai a nei an ti), kei ni hi chu kan ei a tlem avangin min pek theih loh ngawt a rinawm lo a ni. 

Chumi ngaihtuahna nei chung chuan he kan ram dinhmun tawn mek hi han thlir ila, pawisa nei lo tia lo ṭawnga lo mangan tur a ni dawn em ni ṭhiante u? Kan Finance Minister hian pawisa awm loh hi tun thlengin vawi khat pawh a la sawi lova, mipuiin pawisa kan thawh theihna turin a ngawi mai mai a, a tawpa a mipuite rilṭam lohna tur leh Chief Minister a nih anga state khai chhuahna tur package hi chu a neih fel sa diam a rinawm. 

Tunah hian kan state hi kan pachhe zawk zawk tawh lo, thawh chhuah nei tam lo mah ila mipui kan tlem avangin kan ramah hian sorkar hnathawk hlawh leh loneitute avangin kan ṭam a rinawm lo a ni. Hetia kan sawi rual hian chhungkaw ṭhenkhat chuan Covid-19 vangin hna an chan lo thei lo ang a, harsatna chu an tawk ngei ang; mahse a hnam pum hi chuan kan ṭam a rinawm lova, chubakah a state pum hi chuan kan mangan ka ring lo ve tawp a ni. 

Thil ngaih pawimawh tura ka ngaih chu kan ṭhalaite phai lama eizawng tura kan duh em em rual hi eizawnna tihtawp avangin an lo haw nasa dawn a ni. Kan ṭhalai zingah Hotel a thawk hi sang chuang an ni ngei ang a, Spa lama thawk phei chu an tam dawn lutuk, heng hi Covid-19 vanga buai em em tur hna chân tur ber berte chu an nih avangin heng mite tan state sorkar hian package nei thei se tih hi ka rilruah a lo lang lian ve khawp mai. 

Chief Minister interview kha Deccan Herald-ah a lo lang a, Google aṭangin ka zawng chhuak leh ngat a, "Mizoram Chief Minister Zoramthanga has said that the state would not face any economic crisis in the wake of the coronavirus outbreak, if the natural resources are used effectively. In a video message, the chief minister said the state government, churches and NGOs are making collective efforts to combat the COVID-19 crisis," a ti tlat a, hei hi a rintlak ka ring a ni.