Zirtirtu sem rual ngam lo Minister!

August 21, 2018 (Thawh­lehni)-a chhuak Vanglaini-ah MZP thu leh hla tarlan a ni a; chutah chuan, School Education Minister Pu H Rohluna'n, khawpuiah sor­kar zirtirtu tam deuh tih sorkarin hre mah se, Mizoram inthlanpui a hnaih tawh avangin zirtirtu indaih lohnaah an sem rual ngam lo tih a sawi thu ziah a ni.

Minister ṭawngkam an tarlan dan chuan, 'Khawpui Aizawl lamah hian zirtirtu chu tlem chuan an tam deuh tih kan hria a, mahse, khawpui aṭanga thingtlang lama zirtirtu sawn chhuah hi inthlanpui a hnai tawh si a, tun dinhmunah chuan kan ngam rih lo a ni. MZP-te hian min lo hrethiam mai teh u,' tih a ni. Zirtirtu intam hleih lutuk sem rual tura sorkar ngentu MZP-te chuan Education Minister thu sawi hi mak an tih thu leh pawi an tih thu an sawi. A ni tak a, hetianga Education Minister Pu H Rohluna'n thu a sawi leh thil ṭha a ti ngam lo hi a pawi tak zet a ni.

Tun hma aṭanga miin an sawi ve fo chu, 'Tlâk hlau rorel hi ramin a chhiat phah' tih hi a ni. Minister ṭhenkhat chuan inthlan leha tlin loh an hlauh vangin thil ṭha an ti ngam lo a, ram leh mipui tana ṭha leh ṭha lo tur pawh ngaihtuah loin, inthlan leha an tlin leh theihna tur ringawtin thil an ti ṭhin. Chu chu ramin hma a sawn theih loh chhan a ni fo bawk.

Tuna Education Minister thu sawi pawhin hi 'tlâk hlau rorel' ang tho a ni. 'Inthlan a hnai tawh si a, candidate ka ni ve leh dawn si a, tlak ka hlau si a, tunah chuan thil ṭha, thingtlang zirlaite ṭhatna tur leh zirna ṭha an dawnna tur pawhin thil ka ti ngam rih lo," a tihna ang vel a ni.

Inthlan hnaih vang te, mi lâwm loh zawnga thil tih hlauh vang leh tlak hlauh vanga thil ṭha ti ngam lo Education Minister kan nei hi a pawi, a pawi tak zet zet a ni. Ram leh mipui rawngbawl tur leh an hmasawnna tura hna thawk tura thlan tlin a nihnate hi a hai ta em ni le!?

A nihna takah chuan, ram leh mipui, a bikin zirlaite tana ṭha tur pawh ti ngam lo hi Education Minister ni tlak a ni lo a, ram hruaitu ni tlak a ni lo. Eng ang pawhin hmui leh ká hmangin 'Zirna tihhmasawnna atan nasa taka hma an lak thu' sawi ṭhin mah se, a taka an thil tih leh chêt dan erawh chuan zirna hmasawnna lam a hawi hlawl lo a ni.

School Education Minister hi mipuiin kan beisei dan nen a inletling hlauh a ni! "Zirna ṭhat phahna tur a nih a, thingtlang lama zirlaite'n hma an sawn phahna tur a nih chuan, zirtirtu sem rual hna a rang lamin kan thawk ang a; thil ṭha kan tih vanga kan tlak phah a nih pawhin, kan chán ngam ve ang chu," ti turin kan beisei a ni. Hetiang hian ṭawngkam nei se, a tak takin hma han la ngei bawk chiah se la chuan, Mizo mipui hian kan va ngaisang dawn tak em!

- K. Zoramchhana