KA PATHIAN

Ka Pathian chu vanah a awm an ti ṭhin a, kei chuan hmun tinah a awm ka ti. Amah chu eng ang hmel pu nge erawh ka hre lo nain a hmel chhe lo a nih ka ring.

A kiangah chuan mitin an tlangnel ka ring a, a ṭawng tui tam a, fiamthu a uar erawh ka ring lo. Engkim a tih theih ka ring nain kan dil leh beisei ang vek erawh chuan a hlawhtlin tir vek ka ring lo. A chhan chu a rorelnaah min telh ve ngai tlat loh vangin.

Ka Pathian chuan kan nimin hun a hria a, kan hun hman tawh leh hman tur thlengin a hre vek a, kan thil tih ṭha leh ṭha lo pawh a hmuh hmaih ngai lo. Nimahsela chuti chung chuan kan duhthlanna a nghah zawk fo avangin mi a thunun nghal lem lo fo. A nelawm em em rualin a zahawm a, a thusawia a rinawm avangin belhtlak a ni a, belh ngam loh tur khawp erawh chuan a hlauhawm si lo.

Rilru thianghlim leh mi dikte tan chuan a nelawm a, thinlung sual leh kawhmawh bawl chingte tan pawh sima a lam pan theih turin a inhawng reng a ni.

Ka Pathian chuan amah hnaih turin mitin min sawm a, a lam pan turin min duh reng a, mahse keini erawh chuan hlat tak tak ngam si loin kan hnaih ngam bawk chuang ṭhin si lo a, tuilai rapin hun kan hmang reng zawk a nih hi. Manganna kan tawhin Amah chu kan au a, dik lo taka sum lakluhna hun a awmin Amah chu kan theihnghilh leh a, kan damlohin A hnenah damna kan dil a, kan dam a. Amah aia kohhran mitmei veng zawkin rawngbawlna kan nei leh a, eirukna leh kut tling loa lakluh vangin In ropui leh nuam tak kan nei a, a chhungah ‘kei leh ka chhungte chuan Lalpa rawng chauh a ni kan bawl dawn’ tih thu tar kan hreh leh chuang hauh lo. Bible lah chu kan dah langsar em em a, kan chhiar peih leh chuang si lo!

Ka Pathian chuan kan thiltih ang zelin lawmman min pe ṭhin a, nimahsela kan phu tawk lawmman kan hmuhin kan lawm chuang lo a, lang­sar taka rawng kan bawl laiin Ani chuan pindan chhunga Amah betu chu a ngaithla zawk si.

Rawngbawlna in­chei­na atan kan hman rah kan seng a, kan kristian percentage pawh a hniam zawnga a than tak daih hi! Kohhran tin hian hmuh theih loh, vana kan Pathian mittlung tak hian rawngbawlna nei ṭheuh ila chuan India rama HIV hrik pai tam ber kan ni hauh lo ang. Missionary nuai khat pawh a takin kan tir thei ngei ang.

Ka Pathian hian he kan ram hi hei aia hmasawn tur hian rahbi min la rah tir hi ka ring tlat a. Engtik hunah nge chu hun chu a thlen ang? tiin zawhna ka inzawt reng a, beisei nei takin ka thlir a. A mi thiang­hlim mi tlemte te ṭawngṭaina hi a thlawnin a awmtir ka ring si lo.

‘Ka Pathian, ka Pathian engah nge min kalsan’ tia bei­dawng taka kan auh hun hi thleng mawlh suh se.

- Mahmuaka Chhakchhuak