Pasal min zawn pui teh u!

Tun hnaiah hnam dang pasal neih chung changah MZP leh CYMA ten thawm an nei lian hle mai a, MZP phei chuan zirlai ṭhahnem tak hnam dang nei lo turin an intiam tir a ni awm e. Ram leh hnam humhalh an tum a, a ṭha e. Chutih rualin kan nula ṭhenkhat pasal neih hun tawhte thu leh hla hi i lo ngaithla chhin ang u hmiang.

V Central Govt. hnuaiah officer ka ni ve a, pasal neih ka duh tawh a, Mizo tlangval ka hna ang level thawk ka melh deuh a, an awm der lo... a awm ve chhun chuan Aizawl nula, a awmna apianga zui thei a nei daih. Ka hmuh ve chhun chuan ka hna hi bansan turin min ti si, neih tur ka la hmu lo a nih hi; min lo zawn pui teh u.

V Company lian ve tak hnuaiah ka thawk a, kan hmunpui chu Delhi a ni. Hnam dang pasala neih chu ka hreh khawp mai. Kan company-ah hian Mizo tlangval thawk ve an awm lo. Min hnaih ve deuhtute chu zirlai an ni tlangpui a, movie leh dinner ka treat an beisei ṭhin. Zu in mi ka duh loh avangin pasal atana ka duh zawng ka la hmu rih lo. Aizawl tlangval hausa ve takin min rawn beisei ve deuh a, amah hian hna a nei lo a, chhungkaw hausa ve tawp an ni a, a chhungten ka hna bansan se min ti a ni awm e. Hna nei lo ve vea an chhungkaw hausakna tlan ve ringawt chu ka chek hian a mil si lo; ka senior ṭan chu a ni deuh der mai.

V Hotel Management thla ruk chhung ka zir hnuah 5star Hotel-ah ka thawk. Mizorama hna hmu lo chiang sa hi ka phak tawkah hna ṭha ve tak ka thawkin ka hria. Nula luck tia sawi tur ka ni ngai lo a, phak tawka rawngbawlna ngai pawimawh ve tak ka ni. Aizawla ka haw chang pawh hian min be ṭha ve deuhtu chu ka tawng

ṭhin a, kohhrana inhmang tak tak pawh an ni ve fo; mahse ka hna bansana zui tur innghahna tlak tlangval erawh ka la tawng lo. Ka hna hi pasal hruaia thawh chi a ni der si lo... min chawm thei tur leh hna nghet nei ve pangngai hmu ila chu ka hna pawh ka bansan hreh lo. Mahse chutiang chu tawng miau hek lo i, mi lo zawn pui teh u. Ka dinhmun anga ding hi ka ṭhiante pawh an tam lutuk, kan sawi ho fo ṭhin.

V Singapore-ah House­maid-in ka awm a, kum 4 lai chu ka awm ve tawh. Lo haw a pasal neih pawh ka duh reng, pasal tur erawh duh zawng ka nei ve. Ruihtheih thil ti lo, chhungkaw mawhphurhna la thei leh min chawm thei ngei ni se. Chhungte thawh chhuaha inla vung ve ringawt ho hi chu pasal atan ka nei ngam lo, future a bright lo em mai. Hetiang ka duh ang chi Mizo tlangval hi neih tur an awm phawt chuan lo haw tawh mai pawh ka duh - min lo zawn pui ta che u.

V Aizawl nula vantlang, kohhran leh khawtlangah pawh inhmang ve tak ka ni. Pasal neih hun ka ni ve tawh a, min beisei vetu neuh neuh hi chu an awm reng. Pasal atan hian duhzawng ka nei ve a, piangthar ṭha, kei leh kan fate chawm zo ngei tur ka duh. Kohhrana ka inhman pui ho hi an fel hlawm viau a, chhungte thawh chhuah ring ve mai ho leh pa te ro khawm hma­chhuan ve ngawt ho hi ka nei hreh ve ting tang sia, mahni inhai kaw thei chin ho lah hian min melh kan leh deuh reuh bawk si, ka laklawh tak tak a ni. Kawppui tur ṭha tak chu hmu ila ka nei duh reng tawh - min lo zawn pui ve teh u.

Kan nulate dinhmun chu tihian kan hrethiam tlang ang chu maw, a khirh asin. Mipa kan harh chhuah a ngai hle mai. Hmeichhiain hnam dang pasalah neih loh tur tih hi chu zawm a la harsa dawn chauh. Kan tlawmngai pawlte pawh hian heti zawnga zirtirna an kalpui tel theih chuan a ṭha hle ang.

- Mathana, Hunthar