ZPM sawhthing sawi hi

Tunlaia Zoram Peoples Movement (ZPM) sawhthing kg khat Rs. 50 a lei leh hmunphiah kg khat Rs. 100-a lei an tum thu an sawi hi a rate hi a sang hle mai a. Lo sorkar ta sela an lei thei tak tak ang em tih hi zawhna lian tak a ni.

ZPM hian an lei sa chu khawiah nge, engzatin nge an hralh theih ang tih chiang takin Zoram mipui min hrilh chiang se. Politiccal game mai a nih lova kg sang tam tak an lei thei zel dawn a nih phawt chuan Mizo mipui kuthnathawktute tan a lawmawm em em dawn a ni. Sawhthing quintal khat Rs. 5000, quintal 10 Rs. 50,000; quintal 100 Rs. 5,00,000 a ni dawn a ni.

Kum 1996-97 vel lai khan sawh­thing kg 1 Rs. 3.80 in MAMCO-in Zuangtui kawng kamah an lei tawh a, quintal khatah kg 10 te an paih zel a, lei sen loh a ṭawih hnem em em bawk a. Eng emaw lai khan Hmeithai Association hotu Pi Veronica K. Zatluangi'n Republic Vengah a lei tawh bawk a.

Tun hnu hian leitu mumal sawi tur an awm ta lo nge, thawm a reh ta hle. Thingtlang ram hnathawkte hlawhtlinpui awlsam ber hlawk hma ber, sawhthing hi tuna Congress sorkar hian a hralhna ṭha deuh tur a zawnpui leh buaipui kan hre bawk si lo.

MNF sorkar kum 10 chhung khan manhla deuh zawka hrlahna tur an hriatpui chuang lo bawk a, kut­hna­thawktute hmakhaw ngaihtuah thiam tak heng party pahnihah hian an awm lo a ni.

NLUP pawh a ṭang­kai chin chu a awm ang. MNF-in SEDP an han sawi mawi ve leh bawk a. Sem ral chi reng reng hi chu thil tlo a awm ngai lo. Leilunga thar chhuah zel chauh hi ro hlu chu a ni. Buh hmun leilet pawhin kum tin buh a thar chhuak ṭhin a, tu leh fate rohlu a ni bawk. NLUP/ NEDP/ SEDP hi 'vote' zawn nan chuan a ṭha maithei, ro (asset) tling tur erawh a ni lo.

ZPM kher lo pawh hian kan ram thlai thar awlsam ber ber, sawhthing, aieng, hmunphiah te hi sorkarin thapui thawhin buaipui sela chuan kan mipui rethei tak takte hi tun ai chuan an nuamsa ngei ang a, ram pawhin hma a sawn bawk ang.

Tunah ZPM-in an policy hmatheh bera an neih takah chuan sawhthing leh hmunphiah avang chauh pawh hian ngaihven loh theih loh an ni ta a ni. Pu Lal Thanhawla leh Pu Zoramthanga te hian an hun laiin lo buaipui peih hram hram se chu tun ang em em hi chuan Mizo mipuite hi kan rethei lo tur.

- L Lalrempuia Pu