District kan buaipui nasat chhan hi!

Mizoram mipui nuai 11 vel chennaah District pariat (8) kan nei mek tih hi inzawh ngai miah lovin kan hre chiangin kan bel hlawm em em a. Heng District pariatte hi ngun taka kan thlir chuan an changkang viau hlawm lem lo, sawrkar hnathawk erawh an tam phah em em tih erawh a hmuh theih a, sawrkar hnathawk an tam chuan sum lengvak a tam phah ngei pawhin a rinawm. Kan district neihsa te an changkan bik lutuk loh chhan leh office dawr nikhuaa thawktu awm lo tih fo te hi a va han ṭha lo ṭhin em, khawdang aṭanga hnathawk tam vang niin a lang a, an khuaah an haw fo a, hna an ṭhulh phah nasa viau. He thil hi thuneitu lamin enfiaha siamṭhat atan a ṭha hle.

Enge district kan duh chhan tih hi inhnial theih tak a ni. Politics lama inhmangte chuan an party tihtur a nih loh chuan an sawihnawm char char a, a tiamtu lam erawhin hahipin an fak thung.

Tunah hian kan hriat ṭheuh angin khaw pathum Saitual, Khawzawl leh Hnanthial ten District an ngiat mek a, heng khaw pathum bakah hian Darlawn lam pawhin hmasawnna an neih loh em avangin District an ngiat thu kan hre ve tawh bawk. Eng vanga District hi duh em em nge kan nih?

District kan duh chhan hi hmasawn kan duh tlang niin alang a, hmasawn duh khua heti zat kan nei hi a lawmawm tak zet. Kan sawrkar neih tawh hovin hmasawnna hna tam tak thawk bawk mahse heng hmasawnna te hi khawtin, in tin leh chhungkaw tin thleng phak lo a nih tlangpui bawksi avangin kan khua hian hma sawn ve se tih kan duh vang a ni. Ngaihthah nih reng mai hi thil engkimah hreawm tak a ni tih chu inhrilh nawn fo ngai loa chiang hle - District pek an nih chuan heng khua te hian an khuaah loh theih lohin development a luang lut dawn tih an hriat vanga District hi ngiat an nih a rinawm.

Sawrkar inrelbawlna fuh tawk lo vangin thingtlang mirethei te te awm­khawmna khuate tan hian thiltih a harsat em avangin awlsam zawka thil an tih ve theihna tur a nih avangin District hi an duhpui hlawm niin alang. District awmna khua hla tak tak pan fo ngai tur kha awlsam zawka an pan theih tawh dawn vang niin alang. Entirna pakhat sawi ta ila, Champhai District huam chhunga khaw ṭhenkhat Tlangpui, Tlangmawi, Khawhai leh Sialhawk lam tlangdung tan chuan ration card-ah harsatna an neih pawhin Champhai pan an ngai a, an tan Champhai kal hi thil hautak a nih bakah thil harsa tak a ni. Ration Card-a hming paih leh dah luh ngai ringawtah pawh a hranpaa motor hman a ngaih tlat chuan thingtlang mirethei tan chuan phurrit a ni lo thei lo. Heng tlangdung tan hi chuan Khawzawl hi District nise chuan Aizawl kal tur Sumo-ah Khawzawl thleng an kal ang a, Aizawl aṭanga Sumo haw lamah an chuang haw leh mai dawn a ni. An tan chuan kawng ava awlsam phah dawn si em!

Heng District Headquarter ngiattu khaw pathumte hi ngun taka ngaihtuah chuan an khuaah development a lut

ṭha lo hle tih a chiang a, khawvel hma­sawnna ken tel vanga changkan lam leh hmasawnna lam erawh hmuhtur a awm vek. Hei hi chu khawtin, ram tinah khawvel changkanna in a ken tel a nih avangin changkanna leh hmasawnna hi chu hmuh tur a awm zel ang.

Saitual (Ṭawi bial) hi District vangin hmasawn an inbeisei a, bialtu MLA Cabinet Minister nia party-ah pawh a lal ber dawttu Vice President meuhin a bial a. District pe lo pawh nise development an hmu ṭha tura ngaih a nih laiin an hmu ṭha bik chuang lo. District ngiatpui vangin bialtu MLA Lalzirliana’n a Cabinet nihna a bansan a, party aṭang hnawhchhuah a ni zui bawk. Hei hi chu District vang chauh a ni. Kum sawm chhung Home Minister bial ni si ngatinge development lamah hian an hnufual si tih hi thil mak a tling!

South Tuipui bial lam aṭang hian bialtu MLA John Siamkunga hi a reh vung vung hle mai, a hnathawhah pawh a thawh

ṭhat em em hriattur a awm lo a, a thawh chhiat em em pawh hrit tur a awm chuang lo. A bial chhung development-ah erawh a chak lo tih a lang thung. Hnahthial-in District an ngiat chungchangah pawh thawm nei lo ber a nih a rinawm. Inthlan lehah a tling zo leh ang em tih chu zawhna lian tak a ni a, a bial ngaiah a ding leh ngam ang em tih pawh hriatthiam har khawp a ni bawk. A bial mipuiah a tla na vak lo niin alang a, chutih rualin a party puite erawh chuan an fak em em thung.

Khawzawl (Tuichang) lamin boruak an nei lian leh deuh a, tuna kan sawrkarin District an pek tawh an tihpuitlin sak chuan party dang aṭang candidate siam lo turin party dang an ngen hial. Hei hi a takin a thleng dawn lo tih kan hotute thusawi ṭhin dan aṭangin a lang chiang hle. Bialtu MLA Lalrinliana Sailo pawhin Congress party tana hriat nuam lo tak tak a sawi chhuah phah fo tawh a, party aṭanga hnawhchhuah erawh an tum lo niin Lalthanzara ṭawngkam aṭangin a hriat theih; hnawt chhuak loa candidate pek loh an tum nge ni ang ti chu zawhna a ni mek.

Pu Lalrinliana Sailo pawh hian a bial chhung development lamah a vur lo hle a, han fak hluaina tur vang tak a ni. Cabinet a nih lai pawhin development hmuh tur a vang hle tho a, MLA fang a nih hnu phei chuan vang tak a ni. Pu Tawnluia vote 3000 aṭanga 4000 laia a tlin a rinthu a sawi ta hial a, hei erawh thil awihawm lo tak a ni thung. Pu Tawnluia hian tling tur chuan a beih fe a ngaih a rinawm, a kum a lo tam tawk bawk nen iai tu hi an ṭhahnem hle tih hriat tel a ṭha hle awm e.

Engpawh lo sawrkar dawn se heng khua hi chuan District an duh a, an bialah chuan Congress tan hmun a awm lo maithei. Chutihrualin district hi pek pawh lo ni hlawm tehreng se a khaw

ṭhenawm lam hian RD Block etc. lam an beisei ve leh zel dawn a, hengte hi intih lungawi lohna lian tak thlen thei a ni. Entirna pakhat dah leh teh ang- Khawzawl hi district ni ta se Kawlkulh, Khawhai leh Sialhawk ten RD Block an beisei a rinawm. Khawhai hian phu viau mahse khawdang an pek chuan Khawhai leh a chhenvel khaw tan chuan na tak a ni dawn. Chutiang bawkin khaw dang dang pawh an nih vek dawn avangin ruahmanna fel a ngai hle.

Heng district ngiattu chauh hi hmasawn duh an ni lo a, Mizoram khaw hrang hrangte hi hmasawn chakin kan tuihal huam huam a, hmasawnna kan neih loh hlawm em avangin kan in phun chau zo a, inthlan leh hunah pawh vote tur bik hriatthiam har kan ti hlawm viau a nih hi. Party politic ruihchilh ho chuan an party an fak chiam chiam hlawm a, an fakna ṭawngka erawh nuih tiza mai a chang zel si a nih hi.

- C. Lalremmawia, Khatla South, Aizawl