MLA tlanchhia neih fo mai hi

Tun hnaiah Champhai Insta tih Instagram page Champhai ṭhalaite siam nia ka ngaih ka han en chu Champhai MLA pathum Kuhva Tawlh Ruk chungchanga an ngawih bo tlat avanga ṭhalai lungawi lohna lam ka lo hmu a, "Champhai District MLA Bo Zawnna' tih chu a thupui a ni.

A hnuaiah chuan, "Bo zawnna Pu TJ Lal­nun­tluanga, Pu ZR Thiamsanga, Pu Ramthan­mawia te khawnge an awm Champhai mipuiten an hre lo," tih hi a lo in ziak bawk a. Kuhva Tawlh Ruk lam chu thu hran lo ni ta se, mipui aiawha thlan tlinten Party dah lal zawk avang leh Party lama pute hlauh avanga mipui ai an awh ngam lo ta fo mai hi a vei awm ta takzet a ni.

He thil hi a thlen vawi khatna pawh a ni tawh hauh lo. Congress hun lai pawh khan a thleng tawh a, MLA ni ve si an bial chhunga thil thlengah pawh an party thu ringawt dah lal, mahni mipui anmahni thlang tlingtu ngei pawh a nihna takah chuan phatsan ang maia tawm bo tlat an awm ṭhin tih kan hmu tawh a ni.

Tun hnaiah chuan a vawi hnih thlenna a ni tawh a. Lunglei mipuiin RTPCR Laboratory duha an nawr lai khan sorkarin chhim lam mipuiin a hranpaa RTPCR khawl an mamawh loh thu te an sawi khum khan Lunglei MLA te khan an mipuite thlavang an hauh ngam miah lo.

MLA atan kum 2023 ah in candidate leh an tum a nih chuan 2021 a mipuiin sorkar laka au a, an thlavang hauhtu tur an mamawh em em lai khan khawgnge an MLA te an awm? RTPCR mamawh lova in sawiin Truenat khawl an lei belh sauh sauh a, an bial mipui nunna (hri avanga thih theih a ni si a) an ngai pawimawh a nih chuan ban huamin sorkar kha rawn au zawk se. Eng party ticket pawhin ding nawn se tlin chance an nei ṭha zawk ang.

Champhai District seat awm zawng zawngah tuna ruling MNF hi an tling tih kan la hre ṭheuhawm e, chu Champhai chuan buaina an tawk a (Kuhva Tawlh Ruk lam chu kan sawi ve lo ang kan tih tawh kha) chutah chuan an hawi zawng tal pawh rawn ti lang ve ngam ang hmiang.

Indo laia ṭan lam nei ngam lo chu mi dawih­zep an ni an tih angin Champhaiin buaina an tawk a, issue lian tak an khel laiin Champhai MLA pathum chu an reh tlawk tlawk mai a ni.

Kum 2023 ah he bial mipuite vote dil ngam leh tur tawk talin rawn inlar ve se, tih theih an neih loh pawhin tih theih an neih loh thute tal rawn au pui ve se. Champhai mipui hriata thlamuanna thu lam a nih loh pawhin MNF party thlirna zawk tal pawh sawi ngam tur a ni a, indona hmuna ngawih reng mai hi chu kan ram rorel khawla mipui aiawha ding tura kan thlante awm dan ni tawh lo se a ṭha a ni.

Hetiang hun kan tawn hi kan MLA te hian inzirna atan lo hmang chhuak tawh se. Tun hnuah chuan mahni bial harsatnaa ding ngam lo MLA chu thlan tlin chu sawi loh candidate ngam tawh lova siam mai hi neutral-te hian tum ta zawk ila a ṭha ang. MLA kan tih te hi voter vang chauva awm an ni si a.

- Lalrinchhana