INDOPUI-CORONA DONA

Indopui II-na khan khawvel a deng chhuak a, kei pawhin chiang takin ka hre ve tawh. Kan khua thingtlang khaw te takte ah pawh sipai an awma rawsawt (ration) pawh sipaiho tan an thlak a. Mahse ram tam tak chuan a thawm an hria a, an tuar ve lo. 

Tuna kan indo pui hri zet erawh hi chuan khawvel a deng chhuak a ni. Mizoram, ram zau lo takah hri kai pakhat a awm a, kan phek buai a nih hi. 

Sorkarin tih loh tur, tih tur te min hrilh a, mahse, sorkarin tun ang reng hian inkharkhip a ti reng thei dawn lo. Sorkar tan tihtur a tam, a ram sum leh pai (economy) ngaihtuah a ngai, hna a ngah lutuk. Sorkar leh khawtlang hruaitu tlawmngaiten darkar sawm hnih pali, nikhat, kumkhat, ni 365 a veng reng thei lovang che. I khawsakna tur a pe thei lo bawk che tih i hria em? Eng nge i tih tur le? Sorkarin ni 40 chuang min veng tawh.  

Tichuan, i thla a muang a, zalen ta riau-ah i inngai mai em ni? Sipai dang, ramdang ramri bulah lo luhna remchang zawngin an la vei sek a nih hi. Tripura state, Kanhmun hnaih lamah an rawn lut tawh. Bangladesh-ah phei chuan a pung chak lutuk. Myanmar-ah pawh phung velh ang maiin an pung tual tual. Khawvelah pawh a pung chak viau - ram hausa sapho pawhin an ngam lo. Keini ram ve tehlul ram phei chuan karei, karei ka dawn ngam lo lutuk. May 17, 2020 a lo ral ang a, engtin nge ni ta ang? 

Inkharkhip a ni a, awm awl tawpin i mu reng mai nge zing dar 10 ah pawh i la mu? A mu rei rei nih te hi ṭha kan ti tlang em? 

Thuawihna, thu zawm, sorkarin tih loh tur, tih tur a tih te kha - mahni taksa, kan theih ang anga vawn ṭhat, zing thawh hma, insawizawi, pu ber ta ang neih a ngai chuang lo, pawn chhuak lova tih theih a tam lutuk. Kan neih ang tawk a, ei leh bar tih ṭhat, in vawn thianghlim, in leh a vel, bungbel, puipunna tel loh nen, nun khawhar a nih pawhin dam kan duh ve a nih chuan kan tih hram hram a ṭul. 

Hunawl hman ṭhat nan lehkhabu chhiar tam, kan thurin bu a bik takin Bible chhiar te pawh a pawimawh hle mai. Kan rin Pathian hnenah kan nun mamawh dil a, ṭawngṭaina hun hman tam a ngai. He hun hi inpawh taka Pathian han biak pawh leh theihna hun siamtu a ni thei bawk e.