I dam em? Ka hre lo

Tunlaia ṭhian dun pahnih inkawm an tih lar em em mai aṭang hian kan ram kal dan a lang si a, a va han hrilhhai thlak em! tih hi ṭhangthar zawkte ngaihdan a ni lo thei lova ni. Kan ram sum leh pai dinhmun sawi chiang thei lo Finance Minister kan nei hi a vanduaithlak a ni; mahse dem lam aiin mithiam zawkin chhawk zangkhai dan zawn hi sorkar leh party din chhuahna atan a pawimawhzia a lang chhuak ta a ni. 

Sangi - I dam em?

Liani - Ka sawi thei lo, India ramah tumahin an sawi thei lova Mizoramah pawh tumahin an sawi thei lo. A chhan chu nakinah eng natna nge ka la tawh dawn ka hre lova, eng harsatna nge ka chungah thleng dawn ka hre lova, hman kuma ka hrisel ang khan ka hreisel zel dawn nge dawn lo pawh ka hre lova, Pathian chauhin ka dam leh dam loh chu a hria. 

Tuna kan ram sum leh pai dinhmun hi mipui hriat duh chu a ni tih hi tlangkam titi aṭang hian a chiang. Kan sum dinhmun tuna mi (present) hi kan hre duh a ni. Kan sum dinhmun kal tawh pawh kha kan hre duh tawh lo a ni. Kan hma lama sum kan hmuh dan tur a zawnga za leh chipchiarin kan hre duh lo a ni tunah hrih hi chuan. Mipuiin kan hriat chian duh chu, 'Kan sum leh pai dinhmun a ṭha em? Khawh luta liam zur zur kha a la ni em? Sports leh Tourism lama vaibelchhe tel budget-a lang hman lo chiah chiah kha a la awm em? Awih harsa zawk khawpa tam sawi ngam loh kha a la awm em?' tih hi Zoram mipui hian an hre duh a ni. 

Mipui mawl ve te te kan ni a, sum kal kual vel dan hi kan hre duh lo, kan hrethiam ve tak tak lo ang. Kan hriat duh chu hri pui dona sum hi mipui thawh kher ngai lovin sorkar sum neih sa hian a daih em? tih hi a ni. Mipuiin kan hriat duh leh zel chu 'Covid-19 leng mahse kan intiam angin nuai 3 aia tlem lo kan sem vek ang' in tih zel dawn leh dawn loh hi a ni. Tunah chuan kan hriat duh loh lam hrilh min tum avangin sum lo kal tur hriat loh thu chhanna kan dawng a ni. 

Sum awm zat hi engzat nge ni tih zawhna chu sum awm sa a zat chhiara sawi mai tur a ni. Tunah hian kan ram sum enkawltuin kan sum dinhmun a sawi fiah dan kha chu Sangi leh Liani ti ti ang deuhvin tunah tak (present) kan dam leh damloh miin min zat se, 'Ka hre lo' tiin ka chhan a ngai dawn, a chhan chu nakina ka hriselna dinhmun tur ka hriat loh avangin. 

Kan kuta pawisa awm zat sawi thei lo, kan kuta pawisa awm zat sawi duh lo, kan kuta pawisa awm zat sawi hreh, kan kuta pawisa awm zat zep tum, kan kuta pawisa awm zat sawi ṭul ti lo, kan kuta pawisa awm zat puan chhuah a hun la ti lo, kan kuta pawisa awm zat puanzar kher ṭul ti lo kan nih lohna turin, 'kan kuta pawisa awm zat hi i puang mai ang u.' Kan dam leh dam ti ila, kan dam loh leh damlo ti mai ila a ṭha a ni.