Inthlan hma hian sawi chiang lawk se

India ram inthlana tun hnaia thil thleng chu inthlan hmaa inthlanna aiin vote thlak hnu, MLA hriat hnua inthlan ṭhat lehna boruak hi a ngaihnawm zawk an tia lawm. Kan ṭhenawm state velah pawh inthlan result puan hnuah lam ṭang an inzawng thar leh hlawm a, Mizorama chiang kek kawka zawhna ka zawh duh chu, "MNF hian BJP hi in thawhpui thei dawn em?" tih hi a ni.

Mizo ka nih angin kei chu Mizo nationalism kalpuitu party MNF hi tlem chuan ka âwn deuh ṭhin a, candidate intluk tlangah chuan MNF lam bawk hi ka vote leh nge nge ṭhin a, tun ṭumah pawh hian chu lam chu ka rilru chuan a hawi a, ka zawhna zawh duh chu, "BJP nen hian an inzawm em?" tih a ni a, hei hi a channa ka duh ang a nih chuan MNF hi ka thlan tur an ni.

India ramah BJP hian state sorkar inthlannaah eng vang pawha sorkar hrim hrim hi an duh a, pawisa sen a ngaih pawhin an seng inhuam a, lal ṭhutthleng ken a ngaih pawhin lalna an thlahlel duh lova Minister hna pawh party tenau deuh deuh an pe a, an tum ber chu BJP thuneihna sorkar state tam thei ang bera din a ni.

Tuna politics kal danah hi chuan MNF hi BJP nena inhaw lo leh kawng tam taka thawk ho tur ang thovin boruak hi a awm a, state danga an tih angin BJP hian langsar si lova Congress paiha sorkar dang din an tum a, chutah chuan MNF hi an hmanruaah an hmang dawn niin a lang.

Ka ngaih tiṭha lo zualtu ber chu, "Kan mal din dawn, kan mal din dawn," tih an sawi nawn fo kha a ni a, BJP nena sawi kawp hlauh vangin MNF hian mal din hi an sawi an sawi a, a rukin BJP nen hian inthlan zawhah chuan thawh dun an lo tum leh tho si a nih chuan ka ngaihdan ka thlak leh dawn a, inthlan hma hian MNF leh BJP hian inzawmna an nei nge nei lo? tih hi sawi chiang ngei rawh se.

Tichuan, mipuiin kan duh kan thlang thiam lehzual dawn a ni.

- Lalmalsawma (Mala)