CM lamah ka ṭang

Kan Chief Minister zahawm tak Pu Zo­ramthanga, kan Finance Minister ni bawkin Mizoram sum dinhmun tunah a sawi theih loh a tih kha a bawplawka lain duh dan hawi zawng zawngin kan sawi zui hi thil chin atana ṭha lo tak, ram leh hnam hmangaih avanga theihna zawng zawnga ram rawngbawltu demna rawngkai thehdarhna a niin a lang a ni. 

Kan Chief Minister khan dawt a sawi lova, chu chang chu ni lovin Mizoram sum dinhmun hi a sawi theih loh tih bak kha chhanna dang a awm lo a ni. 

Opposition lam party hruaitute tum ber nia ka ngaih chu kan Chief Minister hi hual tawt a, sum harsatzia puang lo thei lova tih buai hrim hrim hi a ni. Covid-19 hi a leng emaw leng miah lo pawh ni se Mizoram ang state hi chu thawh chhuah nei ve lo state kan nih avangin kan hausa ngai lo tih chu a chiang a ni. 

Congress lam tehreng pawh hi kum 10 an sorkar chhung khan zu chhiah nena ṭang kawp pawhin kan ram kha state hausaah an chhuah lo tih an in hre chiang ang. Chuvangin, tuna taka hri len lai a la ni zuia Chief Minister ṭawng âwk tir tumna hi a dem awm zawk a ni. 

ZPM lam pawhin pawisa chungchang an rawn tuipui em em chhan hi eng dang ni lovin thil ṭha duh vang lam aiin MNF sorkar beihna tur a zawna an zawn vang a niin a lang a ni. Covid-19 dona sum hi an eiru tih pawh ni lo, pawisa tam lo tih an hriat sa reng a tam lohzia sawi tir tumin thuchah an lo nei ve sek te hi a hun lo a ni. 

Sorkar hnathawk pawl pawhin Covid-19 dona atan sum thawh in huam tawh sa kha an han ṭhulh leh chhan nia lang chu opposition lam thusawi leh social media lam ang thawm vang a nih hmel a, kha pawisa kha a thawhtu tana ṭamna tur ni phak si lo, tling khawm se chu MNF sorkar tana thawk huaina tur sum a ni a, state hausak hlau ang maia opposition an che kha a demawm a ni. 

Kan CM hian state pawisa awm zat a sawi loh avangin thil tihsual a nei lova, a figure sawi dik loh a hlauhawm bakah Covid-19 vanga kan sum lo lut tur a chian loh avangin a sawi lova, tihsual a neih a awm love.