Grape chíngtute tan a va na dawn em!

Mizoram sorkara zu khapna dan, The Mizoram Liquor Prohi­bition (MLP) Rules buaipuitute chuan Mizoram chhung khaw­chhak lama kut hnathawktu mi eng emaw zatte eizawnna titàwp zawngin grape tui sâwr (grape wine) siam, zawrh leh in phal loh turin thutlukna an siam thu chanchinbuah kan lo hmu a; grape chíngtute tan chuan a va na dawn em!

Chanchin thara kan hmuh danin, khawchhak lama grape chíngtute'n an thar chhuah aṭanga grape wine siam chhuahah alcohol 10% pawh tling lo telh turin ruahmanna an siam a nih hmel a, chu lek pawh chu kan sawrkar hian ngaimawhin grape wine siam phal loh turin thutlukna an siam a nih hmel. Eng ngaihtuahna nge maw an put ṭhin ni!? Kohhran leh pawl dangte nawrna vang em ni zawk ang?

Alcohol 10% pawh tling lo awmna grape wine chu siam chhuakin, miin lo in pawh ni se, kohhran tan han ngaimawh viau tur a awm lêm em maw ni le? An ruih bûng bûng phah lo tawp ang.

Hun eng emaw ti kal ta khan Mizorama kohhran lian tak pakhat phei chuan Champhai/Hnahlan vela grape wine an siam chu sakramen atan an hmang niin an sawi a, tunah hian an la hmang zel em ka hre lo. Alcohol a tel leh tel loh pawh ka hre chuang lo a, tlem tal chu a tel turah ka'n ngai ngawt a. Kohhran dangte'n tuna sakramen atana wine kan hmanah hian alcohol a tel leh tel loh ka chiang hauh lo nâin, tlemtê tal chu a tel turah ka'n ngai a. A chhan chu, zu rim a nam deuh tlat, bakah, han in hian zu (alcohol) tlem azawng a tel ngei niin a ngaih theih.

Kohhrante'n sakra­men atana wine kan hmanah alco­hol tlemtê (1%, 2% lek pawh ni se) tel kan hmang a nih chuan, Mizoram chhung ngeia kut hna­thawktute grape thar aṭanga grape wine siam, alcohol tlem­tê chauh tel chu kan pawmpui thei mai dawn lo'm ni?

Champhai leh Hnah­lan vela kut hna­thawktu mi eng emaw zatte'n grape an chìn chhan hi MNF-in sawrkarna an chan hmasak laia an chîntir a nih thute an sawi leh zel a. Chuti a nih chuan, an kut hnathawh hlawhtlinna tur leh an thawhrim rah an hmuh ve theihna tur chu grape chîntirtu sawrkar ngei chuan a tiping leh si a tih theih a. Pa leh pa a intham loh thlak a, a inhmuhsit thlak zozai ngawt mai.

Kan sawrkar hian hah leh rim taka kut hna thawktute din chhuahna tur a ngai pawimawh a, a duh tak tak a nih chuan grape chingtute chungchang hi han ngaihtuah nawn leh lul teh se.

- K Zohmingliana