Inkhawmpui chhang senso
Tlemlai deuh khan Vanglaini lamah hian inkhawmpuia kan ei leh in intuituah chungchang kha thui deuh tak inziak a awm a, ngaihnawm tak tak a awm rualin ṭhenkhat kha chu phunchiar thukhawchang a niin ka hria a, siam ṭhat duhna rilru pu chungin mahni ngaihdan han thawh ve dawn teh ang.
Thingpui hmeh ringawtah pawisa a kal tam lutuk hi a veiawm ka ti khawp mai. Inkhawmpui nikhua kan tih hian Presbyterian hi a lian ber leh mipui ngah ber leh ei leh ina insengso nasa ber an ni a, hei hi entirna atan hmang ila a ṭha ang. Presbytery inkhawmpui, Synod inkhawmpui leh kum thar lamah KṬP, Kohhran Hmeichhia leh Bial Inkhawmpui a indawt chho duah dawn a, tu emaw talin ngaihdan thar a neih beiseina nen ka han ziak teh ang.
Thingpui hmeh senso hi ka lo hre ngai lova, han hriat chian chiah chuan a lo sang vai vai hle. Chhang hi item pathumte an sem a, pakhat man hi Rs 50 te, a aia man sangte a ni. Synod Inkhawmpuiah phei chuan a ‘to’ hi an zawng tawp emaw tih tur a ni a, chhang man to semna inkhawmpui a ni.
“Pawisa nei chuan a man to chu sem se a pawi em ni?” kan ti mai thei a, a pawi dan a awm. Kan thawhlawm hi mi hausa thawh khawm a ni bik lova, mirethei berh ve tak takte sawma pakhat tling khawmte a ni. Chung miretheite’n engtikah mah an ei phak ngai loh hi inkhawmpui palai chinin an han lek vu vu mai a, tunah chuan kohhran hian an insem tui siak chu a ni thawthang ta ber e.
Synod Inkhawmpuiah thingtlang kohhran upate tan phei chuan a khawilai aṭanga ei ṭan tur nge, tih pawh hriatthiam harsa khawpa chhang ‘changkang’ kan han sem hluai mai ṭhin te hi chu thil intihhmuha zawnga ṭha lo tak a ni.
Chhang puarna tawk, chhang zahpuiawm lo tawk hi a awm a, tunah chuan chhang man to leh ‘changkang’ hi a zawnin kan zawng a, chhang mana kan ‘kohhran sum’ kan sen zat hi a san em avangin ka rawn sawi a. Inkhawmpui thleng turte hian chhang tui ve tawk, zahpuiawm lo tawkah lungawi mai ila, “Inkhawmpui thleng hmasate sem aia tui” kan zawn zel chuan kan inkhawmpui senso hi kan buaina min thlen lêttu a ni dawn a ni.
Ruai senso kan la sawi lova, ruaiṭhehnaa kan senso tamzia phei chu sawi ngam pawh a ni lo.
- Lalhmunsiama