Matric result lawmpuina leh subject thlan

Mizoram Board of School Education (MBSE) chuan 2020 a class 10 exam result a tichhuak leh ta. Kum khat (1) hnathawh rah seng tura hlawhtlinna chang thar te ka lawmpui a, in kalzelna turah duhsakna ka hlan bawk a che u. 

Zirlai ten hlawhtlinna an chan theih nana theihtawp chhuahtu mi ropui “ZIR­TIRTU” te hnenah lawmthu ka sawi a, zirtirtu te hi kan ram kalphung siam tha tura bul min tansak tu leh thiam min zirtirtu te an nih avangin kan zah in kan chhuang hle a ni. 

Class 10 result tha kan nei hi a lawmawm a, chutihrualin kan hmalam huna kan nihna tur kawngka kan rap tan chiah a ni. Zirlai ten lehkha kan zirna a zawhna pawimawh tak “HEMI ZAWHAH HIAN ENGNGE KA ZIR DAWN?” tih chu a lo awm ta. He zawhna hi kan nun khawchhuah theihna tur leh hmalama awmdan tur hriltu a nih avangin uluk taka ngaihtuahna/ thutlukna kan hman a pawimawh em em a ni. Zirlai thenkhat tan chuan chhanna awlsam tak a ni mai thei a, nimahsela thenkhat chuan engmah ngaihtuah lo leh hre lo in zirna kan kalpui leh nawk nawk dawn ta. 

Class 10 zawhah hian zirtur hlawm lian tak tak ah then a ni a: Arts, Science, Commerce, Professional courses. Mark tha tak nei a, letter mark hmu hial khawp kan nih pawhin chung subject te chu kan thiam viau dawn e tihna pawh a la kawk ber hran lo. Zirlai tin te hian mahni thiamzawng, thiamloh zawng leh theihna nei theuh kan nih avangin ngaihtuahna fim tak hmang a kan zirtur stream hrang hrang te hi kan thlan a pawimawh em em a ni. 

SCIENCE: Zirlai thiam leh mark tha deuh ten medical leh engineering lama kal an duh avangin an la mai thin. Science hi hna leh tihtur tam tak awmna a ni a, chutihrualin zirtur a tamin zirna hun hman tam a ngai a. Kan zirduh tak technical course kal tur chuan inelna hautak NEET, JEE, NATA, NDA, NIFT, ICAR AIEEE, SMATEE, etc. te paltlang a ngai thung a ni. Heng exam a tling tur hian zir nasat a ngaih dan te, zirtur leh nihtum hresa chunga zirna kan kalpui loh chuan science hian hlawhchhamna leh beidawnna kawngah min hruai ve thei a ni. Science lak dawn a subject awm te: Physics, Chemistry, Biology, Mathematics, Computer Science, Language. 

ARTS: Mark nei tha lo zawk te lak tur emaw kan ti thin a, chu kan ngaihdan chu ngaihdan dik lo tak a ni tih kan hriat a tha. Kan hmalama tih tur awm ah hian hna tam tak min pe thei tu a ni. Central, State sorkar ten hna an lakna reng rengah hian arts subject tel lo hian a theih loh ti ila kan sawi sual tam lo ang. Hei bakah hian sorkar hna kher lo private, NGO, Company, etc. hna zawnna ah pawh tih tur tam tak min pe theitu a ni bawk. Chung atana Subject pawimawh tak tak History, Sociology, Geography, Pol. Sc, Public Administration, Economics, Education, English, Philosophy, Psychology, etc te lak tur a awm.

COMMERCE: Science leh Mathematics lam thiam a, sumdawnna lam tui tan a tha in hna siamtu leh petu an ni. Commerce stream hmang hian hna tha tak tak Investment banking, Chartered Accountant, Com­pany Secretary, accoun­tant, financial advisor, etc. te thawh theih a ni. Subject an zir thin te: Economics, accountancy, business law, business study, mathematics, etc.

Kan zir tur kan thlan dawna hriat tur pawimawhte:

1.    Mahni inhriatchian - tuizawng, thiam zawng, theihna, hobby, etc. mil zawn thiam. 

2.    Nih tum/ hnathawh tum hre chunga thlan.

3.    Hna tamna anih avanga zir ve ringawt loh.

4.    Course/ subject kal­hmang hriat hmasak.

5.    Thian ten an zir dawn avanga zir ve tawp loh.

6.    Admission kan hmuhna a nih avanga subject duh vak loh lak. 

7.    Zirna sang kal tum dan azira Board leh School thlan - CBSE, State Board, ICSE/ISC, IB, IGCSE.

8.    Nu leh pate emaw mithiam te nen uluk taka in rawn chunga thlan.

Eng stream ah pawh hian hlawhtlinna kawng hi a awm vek a - taimakna, tumruhna, mi aia danglam ngamna, hlawh­chham hlauhna kan neih chuan class 10 ah eng resut pawh nei ila hmabak eng tak kan nei thei vek a ni. Nimahsela midang/ thiante kal ang leh thiam ang bawk thiam kan nih chuan hlawhtlinna kawng zawh lo in hlawhchhamna leh beidawnna kawng zau tak kan pan thei bawk a ni. 

Zirlai hlawhtlinna chang te in kal zelna turah theihtawp chhuaha zirlai kalpui tur leh kan ram, hnam tana ṭangkai lo ni turin i inbuatsaih zel ang u.