Saitual leh Pu R Lalzirliana

Congress Sr Vice President leh sawrkara Home Minister ni lai, Saitual leh a chhehvel (Ṭawi constituency) bialtu ni bawk, Pu R Lalzirliana'n HM aṭanga a banna leh, Congress party-in an member aṭanga an hnawhchhuah tak chungchangah titi a tamin Zoram mipuite beng a verhzia leh titi a tih tamzia chu kan hre ṭheuh awm e.

Vanglaini chanchinbu article-ah te pawh kan hmuh tawh ṭhin ang khan, Pu R Lalzirliana hi Congress sawrkarah nihna pawimawh tak tak chelh mek leh tlatlum ve tawk tak nia a lan mek lai a, hetiang ang boruak a han awm ta mai hi hriatthiam a har a, a ma’n a banchhan a sawi, Saitual District, Congress sawrkarin an intiam anga an function leh duh loh avanga bang a nih thu hi kan awih sak meuh lo niin a lang. Saitual khaw mipuite ngei pawhin demna leh mawl ti taka selnate leh District pek chungchang thleng pawhin awm lo tihnate min sawi khum hnem ta hle, Saitual lam thlirna tarmit aṭangin ti zawng hian i han thlir ve chhin teh ang.

“Saitual district champion pui tumna vang ni lovin, an party chhungkaw buaina, Lal family...? te nen an kar thu chhiat avangin thlauh thlakin a awm a, chumi mangan chauhthubarawhin a bial mipuite rilru hneh a tum pah ve mai mai a ni,” tih ang ti ti a tam hle. Hei hi lo dik ni se, khi ta kan sawi tawh ang khian Congress chhungkua leh sawrkarah pawh nihna leh dinhmun pawimawh tak tak chang thei khawp leh party chhiat ber lai pawha lo khaidingtu, kum 20 chhung tehmeuh MLA lo ni tawh leh sawrkara dinhmun pawimawh leh lawk tak tak lo chelh tawh leh, party chhungkuaah pawh a lu lam aṭanga chhiara pahnihna hei chen lo ni ve ta chu lam ṭang leh amah ngaichang eng emawzat an awm ve ngei ang tih a rinawm. Chuvangin, Pu Hawla pawh hian a duh duha a thin thlak theih ngawt a ni bik lo tih a chiang ve khawp ang.

A thinthlak theih dan ber tur chu MLA a nihna aṭanga a tlak chuan a te telh telh dawn, midang a duhsak zawngte an la tlin a, Pu zira a tlak chuan Pu Zira chu a dinhmun a derthawng dawn tih hi a hmu chiang. Chu tih rualin Pu Zira pawh hian MLA nih ngawr ngawr hi a pawimawh hmasa, amah thinthlak tumtute tan chance ṭha a pek loh nan MLA a tlin ve zel hi a ngai tih a hmu chiang ve bawk. Pu Hawla leh Pu Zira te chuan an tum tihlawhtling turin Saitual bial chu an mamawh ve ve.

Saitual mipuite duh leh thupui ber pawh an hre chiang. Saitual hi Pu Hawla leh Rahul Gandhi te meuhin a hmunah ngei lo kala District function min tiam avang leh Congress sawrkarah hian khaw dangte pawhin an thik phak loh tur khawpa duhsak hlawh phu ve nia inhriatna tura Pu Hawla ngeiin min sawi thawmte kan bengah a la cham ve reng avangin a mipui mimir hian district hi an atchilh a ni tih hi an hre chiang hle. Chuvangin, Pu Zira chuan a hmelmate laka a him nan a MLA phawt a ngai, District lo chuan Saitual mipui hian an thlang tling tawh dawn lo tih a hriat ve kar avang hian theihtawp chhuahin a nawr lo a nih chuan ama thlan a lai tih a chiang viau ang. Chutih rualin Pu Hawla hian mi tam takte sawi angin Pu Zira hi a paih duh tak zet a nih chuan Saitual district a pek loh a, Saitualah ngei Pu Zira a din leh chuan a tum ram chu a thleng ngei dawn tih chiang takin a hmu.

Khitiang ang khi a nih chuan kan hriatpui lem loh hian Pu Zira hian a bial hmasawnnna a duh vang piah lamah ama hmakhua atan pawh Saitual District hi remchang apiangah a lo sawi ve ṭhin ngeiin a rinawm a, mahse chu chu Pu Hawla chuan ‘nawte’ a lo ti zel ni tur a ni.

Engpawhnise, Pu Zira chu hnawh chepa a lo awm takah chuan ama mimal hamṭhatna tur leh a lo duh ve em em Saitual District function chu a lo puitlin theih loh takah chuan a bial mipuite hnenah a thlavang hauh tura beiseina neiin a banna thehluhah pawh Saitual hming a lo lam tel ta a, Saitual mipuite Kristian rilru leh rilru ṭha tak pu chuan kan bialtu, kan aiawha kan thlan heti taka zah loh leh nekchepa awm hi bial mipui min zah lohna nia hriain, kan theihtawka a thlavang lo hauh hi kan tih tur tak a niin ka ring.

Amah Pu Zira ngei pawh a dinhmun chhiatlai bera kei ni bak hmachhuan tur a neih lohzia hriain kan lakah thil tihsual tam tak a lo nei tawh a nih pawhin Mizo Kristian rilru punin a harsatna leh manganna chu puitling taka tuamhlawm ṭha kan ti ta a ni. Hei hian amah leh Saitual mipuite inkarah pawh nakin hun thlengin rah ṭha lehzual a chhuah ngei pawh ka beisei. Eng dinhmunah pawh ding se, Saitual leh a chhehvel mipuite hmakhua chu a ngaih lehzual tawh ka ring. He huna a laka Saitual mipuite thiltih hi engah mah a ngai zui lo a nih erawh chuan Pathian pawhin mal a sawm zelin a rinawm tawh lo mai thei.

Mi ṭhenkhat ten intifing leh hre takin 'Saitual mipuite Pu zira bum fin zawh loh' te min han ti bawng bawng ṭhin a, mahse, thil kal vel dan hi ngun takin kan thlir ve a, Mizo Kristian rilru ṭha tak put zela dinhmun chhiaa an din laia kan puihna mamawhtute hawisan mai loh leh kan chunga an lo tihsual tawhte pawh ṭhatnaa hneh hi Saitual khaw mipuite rilru niin a lang. Hetia a chan chhiat lai taka kan hming a lam avang leh a mamawh lai taka a thlavang kan hauh avang hian Pu Zira thlan tlin leh hi kan ba chuang lo, Congress party candidates thlan tlin tawh loh erawh kan ba mai thei?

Tin, mi ṭhenkhat hre em ema inngai ten Saitual District function tir awm an tih loh chhante thiam tak takin an sawi ṭhin. Hria leh thlir thui inti zual deuh phei chuan state sum harsatna aṭanga thlir phei chuan kan District tihpuitlin kan lo tum ve chhen hi min dem hle. Mahse, hei hi ka sawi duh. A khaw thleng leh location-ahte khawpuia siam a remzia te, Aizawl district lian fal lutuk leh khawpui mihring bit lutukin Aizawl district khaw dang Municipal area ni ve lote min hrekziate chu sawi loha lum ni ta se la. Vawiina kan politician kan ram hruaitu ni mekte leh kal liam tawhten min tiam leh sawi hmuh a nih avangin kan beisei hi kan demawmin ka hre lo.

Saitual hian kum 30 chuang liam taa PC hunlaia division pakhat kan neih bak a hnu lama neih belh kan nei ta lo te. Rural development, Block Development officer (BDO) kan neih sa pawh chhuhsak kan ni leh tate hi kan ngawih bopuiin kan tuar rei tawh asin. Kan town populatian leh khaw chhehvel ten kan mamawhzia leh a ringtu mipuite kan tam ang aia kan damdawiin tlabal lutuk te, sawi sen loh khawpa development zuan kan kan nihnate hian District min sawi hmuh takah chuan theihtawpa sual (fight) hi min tiṭul ta a ni.

Kan sawrkar kal tawh leh kal mekte hian District nih kher ngai lo hian hmasawnna hi a nihna angin kal tir ni se vawiina kan sawi kan sawi hi sawi a ngai lo tur.

- Thomas Lalnunmawia, Saitual PWD Veng