Ka tawn hriat ve

Dr. Thangchungnunga nen kum tir lam aṭang khan lehkhabu ziak a tum thuhlaah kan inbe zeuh zeuh a. Ani hi Gold Medalist, a hnaa hlawh­tling tak a ni. Thingtlanga a thawh tawhnate hriat zui pawh a hlawh hle. Article ṭha leh mi beng verh tak tak a ziak ṭhin a, rûlngânin a chuk kha ram pumah a thang chhuak a, Mizo pa lâr zingah a tel pha a ni.

Tawn hriat ngah tak a ni a, a lehkhabu ziah hmasak bera a tawn hriat hi a tawn hriat azawngah mak danglam tak a ni leh ta cheu. A bu hming atan a lârpui ber, Rûlngân ka phuah a, Ka Tawn Hriat tih hi a hmang ta zâwk a, a fuh phian nghe nghe a ni.

May ni 10 velah khân a nau Mawia (RM Electronic & Digital) siamsak, a lehkhabu dummy dak hlak mai a rawn keng a. Ziak zawm leh zawm loh chungchângah enpui nasat a ngaih tur thu Mafa-a min hrilh chu ka rilruah a riak reng a. Mahse, Pu C. Chhuanvâwra leh a fapa Summy-a te a endiktir hlauh mai a, ka thaw huai a ni.

Release a duh hun chu a nupui, RM-i thih champha, May ni 27 a ni a. Chhut ṭan theiha kan peih meuh chuan hun a bichilh luat avângin kan tlin ta ngang lo. June ni 10 vel kan tinzâwn leh a. Bu 3000 lai chhut a duh avangin kan hna kal lai inhnâwk vânglai tak a lo ni a, phai lama chhut turin pdf file ka thawn a. Siam ṭhat duh apui a lo la ngah hle mai a, pdf file pawh chu kan umzui ta chiam mai a, a siam ṭhat apiang chu pdf file tharin kan thlâk zel a, pdf file chu kan thlâk zûr zut a ni ber mai. A duh hun, June ni 10-ah chuan kan peih ta!

Pdf file kan inthawn tlut tlut e ti lo chuan eng takin mawlh ni maw? pdf file ni lo zâwk hmangin an lo chhu mauh mai! Release kan tum mek lai chuan a zavai maiin chhut nawntir a ngai leh ta rih a. Chhut nawn leh hma zawng chuan ṭul a tih lai apiang a siam ṭha leh ta ngat ngat a. Kan chêt sual aleiah siam ṭhatna hun a ngah phah ta phian a ni. A bu pum pui peih fel leh a nih lah chuan binding ṭha lo siam ṭhain kan la buai zui leh er a. Phili leh buarchuar tak chuan bu 3000 chu kan peih hrâm a ni ber mai.

Mi tih anga release ve ngei chu a la tum fan a. Preview ti turin min ruat thul, chairman turin min ruat leh thul. A tâwp a tâwpah zawng a duh hun atan hmun remchâng a hmuh ngang loh avangin, release ta lem lo chuan August ni 15-ah an zuar chhuak ta a ni.

Ni 10 emaw chhung lekin in lama an kawl chu a ral titih ta duk mai a. A thu ziak pahnih belh a duh vangin chhut belh leh nghal mai lah chu a rem rih si lo. An kawl lai lah chu a tlem tulh tulh mai si a, August ni 30-ah meuh chuan hralh tur khaihlak an hlau thlu ta a. A thu ziak pahnih dah belh leh chu ngaih pawimawh chi ziazang ni ta hek lo le, a ngai ngaiin bu 2000 chu kan chhu ta chuk chuk a.

Ka hmanhmawh rilruk tehlul nen chuan press kan din ṭan ni, September ni 1 chu chawlh a ni tih ka hai hlauh mai a, zing dar 10 thleng maiin kan hnathawk tu mah an lo lang ta reng reng lo. A hmanhmawhthlak tehlul nen September ni 1, Inrinni-ah chuan nileng maiin kan khawl zawng zawng chu ek cheh ṭhut takin an ṭhu ngawi hmuk ta mai a.

Bu 2000 tura phek eng emaw zah kan chhut tluk tluk lai chuan hralh tur an khaihlak takngial dawn si a, bu 1000 turin kan tumbun ta chuk chuk a. A ni telin hralh tur a khaihlak a hlauhawm tulh tulh a, bu 500 turin kan tumbun leh ta cheu a. Folding Machine-a bu 1000 tur an thleh mawlh mawlh lai pawh chu bu 500 tur chuan tumbun a ngai leh ta bawk a.

Thupek chu a hmanhmawh­thlak em avangin, tih ang deuh chuan hralh chhuah tur an khaihlak a hlauhthawnawm em avangin ngawrh takin kan phek buai a ngai ta! Hnathawk ho phei chuan fiamthu ti takin, sahdah pawh kan hmuam hman lo, an ti hial a ni. September ni 5-ah bu 500 chu kan zo a, a tuk maiah bu 500 dang kan zo leh a. Kar khat ral hmaa bu 1000 kan zo hman chu tum leh beisei piah hret a ni.

Ni tin a za tela an pek chhuah avang chuan thawk kan la rei hman lo a ni ber mai. Bu 1000 chu kan chai leh ta ngian ngian a. September ni 13-ah bu 500 kan zo a, a tukah bu 500 dang kan peih leh ta. Sumdawnnaah hna duh thawh a nat tehlul nen, Dr. TC-a Tawn Hriat kan buaipui laia hna dang a lo tlazep ve chhen mai chu a huatthlala lek lek a ni.

Thla khat ral hnu chuan eng tak ni zel maw? Kan chhut zawh apiang mai hralh zawh a nih deuh tak zel avangin September ni 19-ah bu 2000 kan chhu ṭan leh ta! A tuk tuk lehah kan Offset Operator lah chu damloin damdawi inah buaipui ngaiin a tlu reng mai a, thaw a veng hlei thei lo a ni ber mai. Hralh chhuah a nih hma chu thu khat, hralh mawlh mawlh lai pawhin Dr. TC-a chuan chawl lovin siam ṭhat tur a dap reng a, kan siam ṭha zel a ni.

Internet khawvelah kan lut a, ‘lehkhabu kan chhiar tawh mang lo, bu tam tak siamin awmzia a nei lo, ...’ an tih mek laiin, Dr. Thangchungnunga dai hriat bu erawh hi chu thla khat chhung lekin bu sang li chuang teh meuh mai an pe chhuak hman a ni. A bu azirin lehkhabu kan la chhiar nasa tih chu hai rual a ni lo. Kum 30 dawn lai lehkhabu kan chhut chhung hian Dr. TC-a lehkhabu tluka hralh tla hi ka la tawng lo hial awm e.

‘A hnuhnung hnung phungin seh,’ an ti ngai a, Dr. TC-a tawn hriat bu erawh hi chu a hnuhnung hnung siam ṭhat a nih zel avangin a ṭha tulh tulh thung a ni. Dr. TC-a tawn hriat bua ka tawn hriat ve hi chhinchhiah tlak tak niin ka hria.

A lehkhabu ziak hmasa ber heti fakaua hralh a tla hi ka lawmpui a, lehkhabu siam chhunzawm zel turin ka duhsakna leh ka ṭha­hnemngaihna chuan a phut tlat a ni.

- VL Zaikima