"HEI RAW" KAN RAM TAN

India ramah chuan ṭangrual tura infuih nan "Ek sat" tiin kan au ṭhin a, Australian football player-te chuan chakna zawng zawng chhuah turin  “um” an ti a, Mizo ten kan tih ve dan ka hre chhiah lo, “hei raw” ka ti ve mai a ni. 

15 May, 2020 (Friday) zan ka mu tur chuan National news ka thlir a, India rama Covid-19 hri vei zawng zawng chu 84,300 a ni tih ka hmu a, nitinin a la san belh zel. Hei hi China aiin a sang tawh zawk a, hetiang zela a pun chuan USA dawt kan ni thuai mai ang. India rama a darh chak dan thlir hian Zoram veng him tur hian “hei raw” tiin hrui khat vuanin i ṭang rual teh ang u. 

Rilrua awm ṭhenkhat chu:

1. Hlawh neiten kan ram ven him nan i thawh ang u: 

(a)    Tunah kan ram hruaituten (CM 60%, Minister 50%, MLA 30%) an thawh dawn - a ropui. 

(b)    Sawrkar hnathawk Group A in 20% thawh ve se la, Group B in 15, Group C ten 10%, Group D ten 5% thawh se (rawtna). 

(c)    Kei pawhin ka pension hlawh aṭangin 15% ka thawh ang, Greenhill Public School hmingin Rs 10,000 kan thawh bawk ang. 

(d)    Kohhran, Corporate, NGO 

aṭanga hlawh mumal tak la tawh phawt chuan thawh zai i rel ve ang u. 

2. Kan naute Mizoram pawn aṭanga lo hawho hi kan welcome a, kan ram a him nan a ṭul ang zelin Tualchhung Kohhran lian deuh leh hall nei ṭha deuhte chuan Quarantine facility pe ila, an ei leh in pawh i tum sak vek ang u. Ni 14 chhung chawm hi a har lo ang. Camping kan ti fo a, kan thiam hle ṭhin kha. 'Organised Bible Study and Zonunmawi teaching' i lo pe teh ang u. 

Tunah hian Chhinga Veng Presby­terian Kohhran leh Khatla South Kohhran chuan hma hruaiin Quarantine facility pein ei tur pawh an pe dawn a ni. 

Tun hi a hun a ni. Kan ram tan “hei raw” tiin ṭan i la ang u. Ramri venhim nan sum tam zawk i hmang teh ang. Income tax pawh tam tak chuan kan pe lova, tun hi kan ram tana thawh hun a ni e.