MI MITA HMAWLH TE TAK TE HMU THEI; MAHNI MITA KHANCHHUK AWM HMU THEI LO

Engti ang zâwngin nge bul ka ṭan ang tih pawh ka hrethiam law... mahse, ka rilruah a lian ve tlat lawi a!

Mahni inhmuh ṭhat hi chu tu tan pawh hian a lo awl êm êm a, fel ber nia inngaihna te, ṭha ber nia inhriatna te, a bulpui berah chuan mihringte hi chapona hian min va luahkhat hma ṭhin tak êm! A ziaktupa ngei pawh hi ka bang bik lo ang, inzir zel tùr mihring erawh kan ni thung e. Mahse, Bible-a kan hmuh, insumtheihna te, dawhtheihna te hi thlarau rah a ni, an ti ṭhin a. Mi fate anga inti rau ve chiam lo tan pawh, engemaw chenah a lo rau ve theih dawn viauin a lang. Insumtheihna leh dawhtheihna ngah tak, mihring fel tak tak an la ṭhahnem êm mai!

Mi mita hmawlh te tak tê chu -

'Pathian thu mi' ni lovin, 'Pa fiamthu mi,' mi ṭhen­khat sawi ṭhin danin, "Kan zu in chauh hi insawi insawi a, kan pum tana ṭha tùra kan bawnghnute in te hi in sawi ve leh duh ṭhin si lo a," a tih ang deuh kha kan niin a hriat. Kan thil tih ṭhat in sawi len sak a, in fak aiin, kan chin ṭha lo tlemte in sawi len sak kan ching a. Mi mita hmawlh te tak te awm hi kan hmu thei êm êm a, mahni lam kan indah ṭha ta ṭhin a ni.

Khawvelah hian har­satna tawk lo hringfa awm bikin ka ring lo a. Tin, tlin­lohna nei vek, famkim lo inti rual awmkhawm kan ni, tih hi kan chian nawn a ngaiin a lang. Chapo tak chunga tling lo intite ang ni si lovin.

Mahni mita khanchhuk lian deuh chu -

Mi mita hmawlhte awm hmu thei deuhte hian mahni mita khanchhuk awm hi an hmuh kân fo niin a lang. Midang ṭhatlohna sawi tùr hre deuh, midang ṭhatlohna leh tlinlohna hmu thei deuhte hi an ṭhatlohna lai an sawi vein, sawisel haw êm êm mihring an ni duh tlangpui lehnghal. Mi hlauhawm tak an ni a, an bula awm tam loh a him viau bawk a ni.

Chuti ang mihring chuan lamṭang an siam thiam êm êm a, an lamṭang anga an ngaihte kuta rul kaw zen lah an thiam duh fû lehnghal. Pawl (N.G.O) hruaitu pawh la ni ngai lo an ni duh fû a, an ni ve tawh a nih pawhin, mi ruala ke pen thiam lo, mi zai ngaia kal thiam lo an ni duh tlangpui. Mihring hian ze hrang hrang kan nei ṭheuh a, kan mithiam Psychologist te'n keini aiin ziah/ sawi tùr an hre hnem zawk ang chu!

Hmânlai chuan -

Hmanlai Mizo pi pute dànah Mizote hi ṭhat leh ṭhat in lâwm tawn ṭhin, a thlum a al ei za ṭhin hnam kan ni a. Chumi chawi vul ai chuan, 'ka ṭhenawm pa hian hralh thei lo se, keiin hralh char char ila,' tih rilru kan pu nasa tawh hlein a hriat bawk. Pathian ṭih phei chu sawi loh, rilru ṭhaṭ inchhuah tawn aṭanga kan zir a, bul kan ṭan thar leh a ngai takzet a ni.

Kan hmelṭha emaw, kan hmelchhia emaw, rilru hi han ṭha êm êm phawt se a pawimawh ber mai e. Tin, inṭhenawm khaw venna thilah pawh, kan chan phâk hauh loh tùr hmelṭha deuh, hnai taka hmuh fo ai chuan, mi rilru ṭha deuh, mi fel tak ṭhenawm ṭha neih a chakawm daih zawk àwm e.

A Tlipna -

Politics thilah pawh thil ni thei lo lutuk hmanga inpuh a, rilru chhe deuh put te hi sim ngam ila. A dik chu dik, dik lo chu dik lo tiin huai takin kal ngam ila. Thil pawimawh ber pakhat chu, "Pathian ṭih leh rilru ṭha tak hmanga Politics kan khelh hi a hun tawh takzet," a ni.

Tin, pawl (N.G.O) ah kan inhmang a, kan tel ve a nih pawhin, engamah hmaa insawisel bâwih bâwih lovin, Pâwl hmasawn dan tur kan ngaihtuah zawk hi a ṭulin a hriat a. Kan in sawi­sel bâwih bâwih hian thawhpuite ah ser nung a tuh mai mai a, hmasawn aiin tlakchhiat a awl zawk niin a hriat. Heti zawk hian ni se ti emaw a ṭawngkam ṭha taka in hrilh kan chin ṭhan a hun leh tawh takzet a ni.

"Mi in i chunga an tiha i duh tùr ang bawkin, mi chungah pawh ti ve rawh," tih thu Bible-a kan hmuh angin, he thu hian kan rilru hi luahkhat sela, Mizo thufingin, "Ṭhenawmte do ai chuan khaw sarih do a thlanawm zawk," an lo tihte hi ngaihtuah thar leh teh ang u. Ramin hma a sawn dawn chuan mahnia bulṭan zel a ngai a ni, tih hi kan hlamchhiah rei ta deuh e.

- David Zochhuanmawia (Vida Hrahsel Saza)