KAN CHHUNGTE AN LO HAW

Kan chhungte ram danga awm an lo haw e, a va lawmawm em! Kan inṭhenna a rei ta. Hna thawka awm te, lehkha zira thangte anni hlawm. Tunlai indopui Corona hri kan do lai a nih vangin engtin nge kan lo dawnsawn ang. Tunhmaa kan lo dawnsawn ang khan kan lawmna pawh kan lantir thei dawn lo. 

Kan rilru a lian ber tur chu Indopui Corona nena indo reng kan ni tih hi hriat reng a ṭha. A ṭul tlat, chhungte chu inhnaihtir loh tur. Tun hma angin kan in chibai lo ang a, kan inkuah lovang, kan ha pawh lang lovin kan inbia ang. Tin, kan chengho nghal mai lovang. Tupawh a lian, a ropui dan an siam angin ni engemaw zah an cheng hrang ang; nakina kan chen ho theih zawkna tur a ni. Thu awi a ṭul tlat. Ram dang aṭanga lo haw ta chenga chhung te hmu lova han awm chu a nuam lo ang. Nidanga haw ang lo takin mahni khua thlen hun in ei tur ṭha ṭha kan ei lo maithei. Tuar hram hram a ṭha ang. 

Hunawl a tam ang, tihtur a vang ang a, ngaihtuahna a kal thui duh hle ang. A pawi­mawh ber zinga pakhat chu lehkha chhiar a ṭha ang. Bible chhiar pawh a pawimawh ang. 

‘Sam’ pakhatna chhiar ṭan a ṭha ang. Sam pakhatna hi chang ruk (6) a ni a, mi pahnih chanchin inang lo tak sawina a ni. Chang khat aṭang chang thum hi mi pakhat chanchin a ni a, chang 4,5 & 6 hi midang chanchin sawina a ni. Khawvel a mihring zawng zawng hi chi hnih kan ni. Ngaihtuah zui theih a ni, ngaihtuah zui ang che. 

Chhiar zel la, Thufingte-ah i fing sawt ang. Lalpa ṭih hi finna bul a ni. Tichuan, thildang zawng zawng aiin i thinlung veng ṭha la, nunna lo chhuahna bul a ni si a. Sam 34 hi han chhiar teh. Nu leh pa te u, kan fa te lo haw ta cheng a, rilru pakhatah chuan hetiang reng renga han khawsak hrih mai dawn chu le kan ti maithei. 

Corona hri hi pakhat chauh Mizoramah a vei an awm a, chu pawh a dam tawk si a. A va mak dawn ve le. Kan chhungte lo haw te hian he hri hi an kai lo ang kan ti ṭheuh a ni mahna, a dik ang. An vei e, dahhran phawt tur kan ti lo. Lam hla aṭanga lo kal an ni, fimkhur vang liau liauva dahhran hi a ṭul. 

He hri hi a chet dan a mak lutuk, a inthlah­chhawn dan te pawh hi hriatthiam har tak a ni. Ba sa ngam mai chi a ni lo. Thuawi taka hotute, kan doctor mithiam, a hriate sawi hi awih a, zawm a, lo inkharkhip ve phawt hi a ṭha ber. Awmdan tur leh khawsak dan tur te hi a hrehawm lutuk lovah ngai ang aw. Hun ṭha kan neih zawkna turah ngaia pawm thiam a ṭha e. 

Nu leh Pa te pawh kan inkharkhip chhung hian Lalpa lam hawi turin kan Thurin Bu hi chhiar tam ila, Pathian pawl hovin, ṭawngṭaina hun hmang tam thei ila, ava ṭha dawn em! Zoram mipuite a ruala ṭawngṭai kha kan rawt thlu zo lo deuh ni khan ka hria a. America ram chuan May 7, 2020 khan National Day of Prayer (ram pum ṭawngṭaina) atan an President Donald Trump chuan a puang a, hmun tam takah Pathian kovin an ṭawngṭai rual an ti. 

Zoram pumah a ruala kan ṭawngṭai theih loh pawhin chhung tinin zan tin darkar chanve tal Pathian hmaa kan kunin ṭawngṭai ila, a va duhawm em! Chhung­kaw tam tak chuan hun ṭha an neih ziah asin. I zawm ve ang u. 

Pathian hnenah tlangnel taka Ama duhzawng a nih chuan engpawh dil ila min ngaihthlak sak ṭhin 

(I John 5:14). Tun thlengin ka hmingin engmah in la dil lo. Dil rawh u, tichuan in hmu ang in lawm a kim dawn nia (John 16:24).