Mizote leh zirsanna (academics)

Mi tam tak hian i va zir nasa ve, i zir tawk tawh lo ami? min han ti ṭhin a, academics ho thiltih leh an tum te hi kan hrethiam lo khawpin ka hria. A mimir mai bakah, a ti mi vêkte pawh hian kan thil tum hi kan hrethiam lo niin a lang.

Sikul te leh college te kan kal lai hi chuan ‘zir’ chu kan ni ngei mai a. Tunlaiah hi chuan MA te pawh hian an zir a ni ber mai. Mahse chumi hnuah chuan Mizoin ‘zir’ kan tih hian a huam zo lovin ka hre ṭhin. ‘Zir’ tih hi chuan, mi hriat tawh sa kan va zir ve, a tih theih ang. Mahse M. Phil level-aht e hi chuan zir ai mahin mahni tawka thil hmuh chhuah tumna a ni tawh zawk ṭhin. Thil thar hlak chu hmuh chhuah tur a awm lo maithei, mah se hriat thiam dan (interpretation) tharte a lo chhuak ṭhin. Sapṭawng hi chuan ‘research’ leh ‘study’ tih thumal an neih hian a sawi fiah khawp mai.

Research degree (M.Phil/ Master of Philosophy, leh PhD/ Doctor of Philosophy) ah hian ‘philosophy’ tih a tel hi a pawimawh khawp mai. History-ah pawh PhD degree la ta ila, Doctor of Philosophy in History a ni ta daih ṭhin a. Hei hi a chhan ril tak a awm. A hmaa kan sawi tawh ‘zir’ leh ‘research’ kan sawi tak, tidanglamtu a ni. Subject tin hian a methodology, kalhmang a nei a, chu mai bakah, subject tin hian thil/ khawvel thlirdan (philosophy) a nei a ni. Chu thlir dan chu a inthlak fo bawk a ni.

Chuvang chuan research kan beih te hian kha mi thlir dan hriatthiam a, kan research khan khami thlirna kha kan thlawp emaw kan kalh emaw a ni ṭhin. Chu mai bakah, subject tin hian ama methodology/ ziah dan a nei a, chuvang chuan historian-in history a ziah leh mi pangngai-in history a ziah chu a inang lo thei khawp mai.

Hetiang philosophy a awm avangte hian Kristian kan nihna hian kan research kalhmang hi a hril a ṭul khawp mai. Hemi awmzia chu mi tinin theology an zir a ngai tihna a ni lo.

Amaherawhchu, hriat loh lai hian khawvel thlir dan hian kan zirlaite/ research hi kan lo thlir fo ṭhin. Khawvel thlir dan hi a dik lo vek tihna pawh a ni lova, mahse research bei mite hian, a bik takin Kristian kan nih chuan, kan thurin dan te thlir thiam a, kan subject matter kan thlir dante hi hriat thiam a, ziah thiam a ṭul khawp mai. Kristian mithiamte sawi dan chuan, kan rinna hian kan research tihduhnate (motivation), kan research tihdan (process) te leh a outcome te hi kan ngaihtuah tel a ṭul a ni an ti ṭhin.

Ka rilru tina em emtu pakhat chu hei hi a ni- mi tam tak hi chuan kan research te hi a degree atan chauh kan bei ṭhin hi. Degree khan hna chu min pe tlat bawk ṭhin si a. A degree duh hrim hrim vanga eng pawh ziah a, thil hriat thiamna belhchhah tur engmah awm lo te pawh hian kan bei ṭhin; mahni vekin kan thil ziah zah pui pawh kan tam a ni awm e. A pawi ṭhin khawp mai.

Sawrkar pawisa tam tak hmang te pawhin research chang­tlung lo deuh deuh te kan bei ṭhin. Research tak tak rilru pu hi kan tlem khawp mai. Kristian kan nih avang te pawh hian, research mai mai, degree atan chauha tih te hi a âwm lo khawp mai. Chumai bakah Pathian zuitu kan nih phei chuan, fel leh dik (ethical) taka kan research beih te hi a ṭul lehzual.

Mi research tawhsa mahni ta anga ziah, thil zawng chhuak tak tak peih si lo te pawh kan tam khawp mai. Mizoram hi academics a san kan duh chuan, post graduate degrees nei tam ringawt lovin, kan discipline/ subject tina thu tak va pawh pha tura research peih leh ngam a ṭul a ni.

- Prof. Joy LK Pachuau