KAN OVER HRET ṬHIN

May 13, 2020-a Vanglaini chanchinbu khan Falkawn Referral Hospital-a Medical Superintendent Dr. HC Laldina thusawi thenkhat an rawn tarlang a, “Mi pakhat enkawlna atan sorkar rate-a chhutin cheng nuai 7 vel zet sen a ni. Covid-19 positive dang nei leh palh ta ila, thawktu hrang hrangte pawhin an zo kher lo ang tih a hlauhawm,” a ti.

May 16, 2020-a Health Minister Dr. R.Lalthangliana thuchah tihchhuahah pawh, “Kan fimkhur loh chuan zan hnih khatah chhiatna vawrtawp tawk thei kan ni… ZMC-ah pawh ICU-ah khum pasarih kan nei a ni mai a, damlo pakhat enkawl pawh a buaithlak a, doctor leh thawktu dangte enkawlna senso pawh a hautak hle,” a rawn ti ve leh bawk a.

Zêp nak emaw, Covid-19 chung­changa kan inzirtirna ṭhenkhat hi chu a over deuh mang e aw tih tur a awm ta fo mai. A chunga kan tarlan, Falkawn Referral Hospital-a Medical Superintendent Dr. HC Laldina thusawi phei khi chu a serious hle a, doctor leh damdawi lama thawk dangte tan mualphona nasa tak a ni thei. “Covid-19 positive dang nei leh palh ta ila, thawktu hrang hrangte pawhin an zo kher lo ang tih a hlauhawm,” tih thu a sawi lai khian kan ṭhenawm state Assam-ah case 100 dawn lai an enkawl mek tih te, Tripura-ah phei chuan positive 150 vel an enkawl mek tihte a hre ve awm tho si a, an doctor-ten khi tiang beidawng ṭawngkam khi an nei ve ang em tihte ngaihtuah tham tak a ni. Ramri veng, khaw lum kara ramhnuaia hrehawm taka thla 2 chuang duty tawh volunteer leh police-te hre chunga ngaihtuah zui tham a ni. Health Minister thuchhuah pawh hi vawm zui fe tlak a nih rualin kan vawm zui rih lo mai ang.

India ramah hian he thu ziah lai hian mi 95698 in Covid-19 hi an vei tawh a, chung zinga mi 3025 chuan an thih phah tawh bawk. A awmzia chu, a vei zawng zawng zinga za zela 3.16% chauhin an thihpui tihna a ni. Union Health Minister Harsh Vardhan-a thusawi, The Hindu-in April 29, 2020-a an tarlan dan chuan Covid-19 vei zinga 0.33% vel chauhin ventilator an mamawh a, 1.5% vel chauh oxygen hman ngaia an awm bakah 2.34% chauh ICU-ah dah luh an ni. 

Mumbai Mizoram House-a Mizo damlo, cancer veite zingah khan vanduaithlak takin Covid-19 positive an lo awm nual mai a. Amaherawhchu, chawlhkar hnih chhung vel lekin an dam ṭha leh mai a, ICU-a dah luh ngai, ventilator hman ngaia awm phei chu an awm meuh lo. Shillong-a Mizo chhungkua, he natnain nasa taka a luhchilh, an pa ber phei chuan a boral phah tak nghe nghete pawh kha, hrisel ṭha sa pangngai chu chawlhkar hnih chhung vel lekin an ṭhachhuak leh mai. 

He thu buatsaih lai hian Assam-in Covid-19 positive 101 an nei tawh a, chu'ng zinga 42 chu an ṭhachhuak tawh. Tripura-in case 164 an nei tawh a, 85 an damchhuak tawh bawk, hrisel ṭha sa pangngai chu an ṭhachhuak ve leh zung zung mai ni tur a ni. An doctor-ten an tlin tawh loh mai an hlauh thu an sawi kan hre lo a, Minister-ten damlo enkawlna senso hautakzia tarlanga mipui an sawiṭhaih vak vak kan hre hek lo. 

Mizorama positive case kan neih chhun kha a chuap a lo luhchilh nasa hman lutuk niin an sawi a, a medical record mipuiin kan hmuh ve loh avangin hei hi kan awih mai a ngai. A ṭhachhuak har a, ICU-ah thla khat chuang enkawl ngaiin a awm a, a pawi tak zet a ni. Amaherawhchu, Covid-19 positive-te hi amah anga enkawl hautak em em vek tura ngaih tur a ni lo tih kan chhehvel state pahnih aṭang te, Shillong leh Mumbai lama Mizo ngei damlote aṭang pawhin a hriat theih. He natna hi a hlauhawm tih chu kan hria; kan mithiamte leh minister-te, official-te meuhin over taka min sawi ṭhaih phei chuan Local Level/Village Level-ah chuan kan khawng nghal em em ringawt mai a ni. Mipui kan chiai a, eizawnna hna thawk ṭha hlei thei lo khawpin kan indang buai a, harsatna kan insiamchawp ta vak ṭhin a ni. Chu chu mi retheiho bawk hian kan tuar leh si ṭhin!

Fimkhur tura inzirtir hi a ṭha e, mahse insawiṭhaih OVER tawh lo teh ang u. Mipui kan rethei lutuk dawn e! Sorkarin a tihtur ṭha taka a tih theih a, ramri a ven uluk a, bungrua lo lut a control a, phai lam aṭanga lo haw tharte a quarantine ṭhat tawk phawt chuan Mizoramah hian Covid-19 hi kan control thei tih a chiang tawh viau e.