Kristiante vote tur chu a chiang
Mizoram General Election 2018 hi Kristian dik takte leh Kristian tak lote inbeihna a ni tiin sawi pawp tawh teh ang. A hun tawh tlat.
A chhan chu - Isua Krista hnung zuitu Kristiante awm dan tur leh tih dan tur Bible zirtirna kalh zawng hlira awm ṭhin leh khawsa ṭhin te, khawvela lalna leh ropuina an chan theihna atana eng ṭawngkam leh eng hmanrua pawh hmang hreh lo, khawvela lal chak em em leh inthlana tlinna tur a nih dawn phawt chuan Pathian duh zawng eng thil pawh ti duh leh Pathian chauh hmachhuanatute indona a ni.
Pakhatna- Kristiante chu fel tak leh dik taka awm a, Pathian malsawmna dawng tlaka taima tak leh rinawm taka hna thawk tur leh, Pathian ṭih tlata nung tura Bible-in min hrilh anga ram leh mipui hruai tumtute an ni a. Chutah chuan inlungrualna leh lungawi tlanna, kan vaia himna leh hlim tlanna a awm a, ram leh mipui hmasawnna dik leh tlo, kawng dik a ni tih hretute an ni.
Pakhat leh chu- Lalna leh thuneihna, mahni nawmsakna leh nuamtawlna a nih dawn phawt chuan engmah pawisak nei lo rei lote atana mipui tihlawma mipui bum tumtute an ni.
Mizoram chhe tial tial engah maha ngai lotute, lalna chauh duh an ni. Heng mite hian mipui bum nan a thlawna thil sem tawktarhah an hmang mek.
A dang leh chu - Mizote sakhua, Kristian leh Mizo culture leh society tihchhiata tihral tial tial a, Hindu sakhua leh Hindu culture-a min siam tum an awm bawk. Heng mite hi eng ang pawhin insawi mawi, insawi mam leh inphat mar tum ṭhin mah se, India ramah hian ni tin zan tin kan mit leh bengin a nihna tak chu a hriain a hmuh reng tho hi.
Chutiangte avang chuan Mizo tlemte hian kan hnam mawi tak leh kan ram zim te leh kan sakhaw thianghlim, Christianity a him zel theih nan leh kan hlim tlan zel theih nan, a hma aia nasaa huaisen taka ṭan kan lak a, rilru fim tak pua huaisen taka Pathian lama kan ṭan tlat a ngai tawh a ni. Rorelna i kutah - a chhe lam emaw, a ṭha lam emaw, Pathian duh zawngin emaw, Setana duh zawngin emaw kan hma lam huna kan hnam, kan ram, kan sakhaw awm dan tur chu nangma thu thu a ni. I duhthlanna ngeia innghat, nangmah ngeiin i rel fel tur a ni.
He indona, Pathian leh Setana indonaah hian kan hnam, kan ram, kan sakhaw tan tu lamah nge i ṭan dawn? He leia i la dam chhung leh i thih hnua i chan tur, i awm dan tur i chunga rorelna chu nangman thutlukna, i vote chhutna tur i kutah ngei khan a awm e.
- K. Hmingthankaia