Khual khuaa exam hi

HSLC result a chhuak a, hlawhtlingte ka lawmpui a, zoram tan a mi ṭangkai ni turin ka chah duh bawk. Tuna hlawhtling ve ta lote pawhin beidawng lovin, a hma aia nasain han bei hram hram teh u. Hlawhchhamna hi tlukna leh dinchhuahna hma­hruaitu a ni bawk. 

Exam center ruat sa a awm avangin mahni duhna hmunah a exam theih loh a, khawpui lamah hi chuan veng kar hla deuh mahse lirthei a la awm a, harsatna lutuk a awm lo. Thingtlang lamah chuan mutbu tela khaw danga exam a la ngai a, hei hian zirlai kum naupang tak tak teah harsatna nasa tak a thlen a, result ṭha neih a har em em ṭhin a ni. 

Chhungkhat in­nghahna tur nei ṭhate chu an la vannei deuh a. Chhungte belh tur nei lo tana kar hnih chuang dawn mai lehkha zir leh exam tur ngawta mi ina mutbu putluh chu hrehawm ve tak a ni. Mahni in lum aṭanga exam ten hun pum mai ngaihngam taka zir nan an hman theih laiin mi inah chuan a ni ve si lo. 

Thleninte mitmei veng rana engkim tih a ngai a, an men bak men dawnin current bill a san phah a hlauhawm si. Khawvar chian hmaa thawh a inthlahrunawm a, lehkha chhiar riin thleninte a tibuai ang tih a hlauhawm bawk nen, rilru a chiai duh khawp mai.  

Ril ṭam deuh mahse duh hun hunah chawbel kan hai hawng ngam tawh lo a, chawhmeh duhzawng thlan chu a hnai tawh lo nasa mai! Chaw ei a lo hun a, 'chawhmeh hi ka suak hnem lutuk ang, chaw a heh min ti ang' tia kaw puar lova hun reitak awm theih a ni tlat. Chhungte lah hian damloh palha invenna tur daih mang lo tur, chah belh hisapin pawisa tlemte zial bo tham lek min pai a. Ren em em tur leh a ṭulah lo chuan hmang lo turin min chah zui lawm lawm a, chung te avang chuan mahni suma in hnawhpuar reng chu thil theih a ni lo. 

Tui khai, eirawng­bawl leh a ṭul ang anga thlen in te puih kha Mizo rilruah thil tih awm tak a ni si. 'A ngai lo e, zir rawh' an tih lahin a inthlahrunawm telh teh emaw tih mai tur a ni. Duh hun huna insil daih a in phih harh te hi mi inah chuan thil nuam a lo ni lo, vawi khat chauh thawmhnaw su fai tur pawhin ka su ang nge su lo ang tih ringawt hian kan in khawp buai rei viau zel. 

Zingkara inbual a, harh veng vawnga exam te kha mahni in aṭanga tih chi chauh a lo ni. Kum tluana mahni ina chhungte thlazar hnuai aṭanga lehkhazir tan chuan kum tawp kar hnih vel, hun pawimawh lai bera mi ina awm thut chuan exam boruak hi a tichhe vek thei hial a ni. 

Chhungte nei ṭha ve lo tan chuan kum tir aṭanga theihtawpa zir ve pawhin exam dawn hnaiah boruak a danglam chuan mihring kan lo inang lo bawk nen thil a buai zo thei tlat a ni. Mipa hi chuan harsa deuh mahse thil hi kan tuar thei deuh zawk a, a bik takin hmeichhe tan a buaithlak zual a ni. 

Sawrkar leh thuneitu lam hian mahni school ngei a zirlaiten exam an hmachhawn theih nan ruahmanna siam thei se a duhawm hle mai. 

Thingtlang school candidate zingah chhungte belh tur nei lo an ṭhahnem kum chuan result a chhe duai thei tlat a ni. Board exam hi thingtlang zirlaite tan chuan a huphurhawm 

ṭhin khawp mai.