KARIMGANJ VAL RUAL, KAN THAWH AI MIN THAWH SAKTU

Khawvela kan lo pian chhuah hian hnathawk tura piang kan ni tih in hriat fo a ṭha. Kut hnathawh te hi a zahawm a, a thianghlim bawk a ni. Hriselna atan pawh a ṭha. Physical activities nei lo reng reng a hrisel tak tak thei lo - zunthlum, thisen sang leh natna ṭha lo tam takin a bawm thuai ṭhin. Pathian pawhin kut hnathawkte chu kawng hrang hrang hriselnate in mal a sawm ṭhin. 

Kan ṭhalaite hian kut hna thawk lova nun khaw chhuah an tum a, chu chu Pathianin a duh lo a niang ruihhlo ten min tibuai a, a hun lovah ṭhalai thihna a tam phah a ni. Kan ṭhalai zinga mi tlemte hlawhtlinna changchawiin a hmei a pain lehkha kan zir a, kut hnathawh hnualsuat tawk chauhin. Lehkha zir kan hnualsuat tur ni loin kuthnathawh thlahthlam phah khawpa zir erawh a ṭha lo a nih hi. 

Ṭhalai zingah sawrkar hna emaw Company (PSU) hna emaw thawk tlaka zir hlawhtling engzat nge awm ang? 5% pawh an tling lo ang. Chuvang chuan white coller job hmu lo pawha ei i lo hmuh ve theih nan tun aṭang khan kuthnathawh hnualsuat suh. Chu chu Zofa ṭhalaite mamawh hmasa a ni. 

Mizoramah hian hna thawh tur a tam. In ṭha nei duhin kan intlansiak a, kan neih bakah Bank loan nen ṭang kawpin chenna in ṭha neih tumin kan phe suau suau a, chu chu Karimganj tlangval rual lawmah a tla a. Kan sum thawh chhuah chhun leh kan loan lak tam zawk phai lamah a liam zo ta ṭhin a nih hi.

Kan in sakna atana material leina hi chu thu hran, kan thawh ve theih reng atan sum tam tak luang ral hi chu a neihkeh chet deuh chu a ni. 

Kan rama vai hnathawk tamzia hi kan ngaihtuah ngai em? Hripui len avanga hnathawh theih loh avangin tam tak an haw thla chung hian khaw tin maiah hian a mawi tawk vai mistiri hi an la awm tho zu nia! Kum khata kan sum vai mistiri kuta lut zat hi chhut ngam chi pawh a ni lo. He Zoram hian Covid19 hripui len vanga lockdown aṭang hian kan zingah Karimganj tlangval kan hnathawk ṭhinte tamzia kan hre ve chauh a ni. 

Kan hmuh phak bak kan leilet zawng zawng min enkawl saktu pawh hnam dang vai kan tih tho an ni. Hetih lai hian zoram ṭhalai rual thawh tur hre lo two wheeler-in kan leng suau suau thung si. Hei hi a ni lawmni ram ṭhanmawh bawk chu? In sak emaw hnathawh tur neiten mahni mi leh sa chhawr nachang hriat a ṭha. 

“Mizo chu an taima lo, tirh an har, an induh, an pro­fessional lo” chuti khati kan ti maw? A teuh lo mai. Harsatna leh mamawh tak takah i Karimganj tlangval chhawr kha i tan a ding lul lovang. 

Kan veng pa Dr. C. Lal­hmanmawia’n in a sa ve a, a tawp thlengin Mizo tlangval a chhawr a, a insak a ṭhat lohna a awm bik lo. Kei pawh tlem lai deuh khan in ka sa ve a, floor tile phah tih loah chuan Mizo tlangval vek ka chhawr a, a chhiat em em thu kan hre bik lo, Mizo chhawr hi tum loh vang mai mai a ni. Ram leh hnam humhalhna ṭha tak a ni. A pawnga takin vai huat a velh a ṭul lo, an thawh ai thawk ila heti zat zat kan zingah an awm lo ang, kan budget min sawhhek sak reng lovang. 

Thingtlang aṭangin kan nu leh paten khawpui Aizawl leh District capital-ah college kal turin min tir a, kan education quality ṭhat loh vang nge? LDC/ Gram Sevak emaw zirtirtu hna hmuh nan em pawh kan hmang ṭangkai thei der si lo. Mahni khaw lama let a hlo thlawh zak tingin kan lo zir sil ve tawh si. Hetianga graduate ve ngawt ai chuan cement mistiri-ah ṭang ila nu leh pa tan leh ram tan pawh kan chhawr nahawm zawk tur. Kan kalphung system hi a la fuh lo zawng a ni. 

Chuvang chuan he hripui leng denchhena kan in kharkhip hi hmang ṭangkai ila, kum hnih tal chhung chu 'hnathawh runpui' i puang ang u khai. Economic pandemic lo thleng tur lo do let nan tun hun hi i hmang ṭangkai ang u.