Vai naupang sual Ravi Zacharias!

1963 khan Delhi khawpuiah Pathian awm ring lo (atheist) vai rawlthar kum 17 chu a let ngát a, mahni intihhlum tuma túr a ei vanga damdawi-ina awm a ni. Chu pa chu vawiin (May 19) khan Atlanta, USA-a a chenna inah a thi ta nge nge - Pathian awm ring loa mahni intihhlum tum kha, tunlai khawvela Pathian thu hrilru leh Kristian thurin humhimtu ropui bera chhâl ngam niin a thi ta - chu pa chu Frederick Antony Ravi Kumar Zacharias a ni.

Vai naupang sual!

Dan naranin Vai kan tihte hi chu an naupanlai ngat hi chuan an felin nu leh pa thuawih tak an ni ṭhin a; nimah­sela Ravi hi chu a dang daih.

March 26, 1946-ah Madras-ah (Chennai ni ta) a piang a, a pa hnathawhna avangin Delhi lamah pêmin he khawpuiah hian a sei lian. Chu rawlthar, chhungkaw khawsak nuam taka sei lian chuan nun awmzia a zawng a, a hmu si lo. 

Ravi hian Pathian awm a ring lo a, a rilru hah chu kum 17 mi lek niin intihhlum a tum a, túr a in ta a ni. A thi ta chiah si lo a, damdawi-inah enkawl a nih laiin Pathian a hmu ta.

Kristian rawngbawltu pakhat chuan damdawi-inah Ravi hi a tlawh a, a nu hnenah Bible a pe a, Johana 14 chhiarsak turin a hrilh ta a.

Keimah ka nun avângin...

Ravi nu chuan Johana 14 chu a chhiar ta a, chutah le, chang 19-na a chhiar thleng a, "Keimah ka nun avângin nangni pawh in nung ve ang," tih a chhiar chu Ravi rilru chu a khawih ta ngei mai.

Ravi chuan, "Kha cháng khan nasa takin min khawih a, nun awmzia hrilhfiahna a ni a... Isu, nang hi a nihna tur dik taka nun petu i nih ngai chuan, chu nun chu ka duh e. He natna khum ata hi min kai chhuak la, he thutak hre tura ka beihnaah ka theihna sang ber ka hlan ang tih ka intiam e," a ti.

Chu pa chu Lal Isua tan a nung ta a ni mai lo a, Lal Isua tana nung tura khawvel mipuite kaihruaitu, ram 70 chuanga thuhriltu, mi thiam sáng leh mi hausa tawntawte pawhin an ngaihsan rawn, university lian zawng zawng deuhthawa Kristian thurin dikzia puangtu a lo ni ta.

Lal Isua tán khawvel lâk... 

Ravi-te chhungkua hi 1966 khan Canada-ah an pem a, a intiam ang ngeiin Lal Isua Krista zuitu ni tur leh, mi dangte hnena 'nun' awmzia hrilh turin a intuai hriam chho ta a.

Ontario Bible College-ah bul a ṭan a, Trinity International University lamah M.Div. a zo. A tirah Vietnam-a US sipaite bulah rawngbawlna bul a ṭan a, Cambodia lamah a chhunzawm a, heng a rawngbawlna chanchin hi ngaihnawm takin a sawi ṭhin a, tehkhin thu remchang tak tak a neih phah fo.

A thiamna, taimakna leh thusawi thiamna lamin a tlin bawk a, Christian and Missionary Alliance in Canada (C&MA) chuan khawvel puma Chanchinṭha hriltu atan 1977 khan an ruat/tir chhuak ṭan a. 

1983 a nih meuh chuan, khawvela Pathian thu hriltute intawhkhawmna hun ropui ber pakhat, Billy Graham Evangelistic Association-in annual evangelists conference an buatsaihah thusawiah sawm a ni der tawh. 

Hemi ṭum hian a ni, khawvelin Ravi a hriatreng tawhna tur a chhar chhuah ni - mi hrang hrang thusawi a ngaithla a, chumi hnu chuan Pathian thu humhimna lam hawia (apologetics) thusawi an tlem tih a hmù chhuak a; khawvel zirna leh thiamna sáng chho zelah Pathian thu dikzia ṭan a, sakhaw dangte zinga Kristianna dik bikzia humhim turin thutlukna a siam ta a ni. 

RZIM a piang ta

Kum  1984 a ni a, Ravi chuan Ravi Zacharias International Ministries a din ta a - Kristianna humhim chu a thupui a ni. 

Mi thiam tak tak, ring lotu ni site nen an debate fo a, sakhaw dang vuantute nen thu an chai a, a hriat fiah bakah a sawi fiah thiam em avangin Ravi thusawi hian ngainatu a ngah sawt hle. 

College leh university hrang hrangah sawmna a dawng reng a, Oxford leh Cambridge aṭanga Harvard University thlengin an sawm âwl lo a; ram ni pawimawh bîk National Day of Prayer leh UN hun pawimawh thlengin a lang ta zel. 

Kristian intawhkhawmna lian thamah sàwm a hlawh mai a ni lo a, sakhaw hrang hrang zuitute thu inchuh (debate) lamah pawh khawvela 'ber' zinga mi angin kan sawi ngam hial ang - ani aia ropui han sawi mai tur kei chuan ka hre lo. 

Thusawi a thiam a ni satliah lo a, lehkhabu ziak a thiam em em a, khawvel huapa lar Kristian lehkhabu eng emaw zat a ziak. 

RZIM hian huang a zauh zel a, tunah phei chuan ram 10 chuangah office neiin Kristianna sakhaw humhimna kawnga thawhhlâwk ber pakhat an ni ta hial. 

Hun hnuhnung

Ravi hi a hnungzang nâ avangin a buai a buai a, chumi an enkawlna lamah chuan zai a ni a, March, 2020 khan cancer a vei tih hmuh chhuah a ni. 

Cancer danglam leh váng tak mai chi a vei hlauh mai a, a taksa a chak lo zual zel a, kum 74 mi niin May 19, 2020-ah a chawl ta. 

A fanu chuan, "Kum 57 kal taa a inhmuh chhuahna thu Johana 14:19 'Keimah ka nun avangin nangni pawh in nung ve ang,' tih hi a thlanlungah kan ziak ang," a ti a; a pa chu tunah chuan,"Tun hma zawng aiin a 'nung' tawh," niin a sawi.