SORKAR HIAN PATHIAN THU KALH ZAWNGIN SEDP KALPUI LO HRAM SE
Kan sorkar flagship programme, SEDP chu mipui hnen thleng tura buatsaih zel niin a lang a, a lawmawm hle mai.
Kan CM zahawm takin mipui khaichhuahna atana ti an nih thu a sawi a. A sawi anga Mizoram mipui khaichhuahna tling programme ni thei se a duhawm takzet a ni.
Tun hma aṭangin sorkar flagship programme hi kalpui a lo ni tawh ṭhin a. Pathian duhdan kalha hleih nei leh thlei bik nei takin, politics khelhna hmanrua atan te pawh hman a lo ni ṭhin tawh niin a lang. Chuvang chu nge mipui sum a ral hnem ngaihtuahin ram hmasawnna tak tak atan kori a tu tawk lo viau ṭhin mai! Mi ṭhenkhat tan chuan a hlu viau bawk e.
Hetiang chi chhungkaw tam tak thleng phak programme hi chu kan ram tana kori tu khawp thil a nih avangin kan ram tan hian a pawimawh em em a ni. Ram hmangaihna thinlung nen ngei a kalpui a ṭul takzet a ni.
Ram hmangaihna thinlung nen fel taka Pathian duhzawng ngeia kalpui a nih chuan a sum tam tawk lo mah se Pathian thawhpuina belh tel chuan ram hmasawnna thlen thei a ni ngei ang. Pathian duhzawng lova kalpui a nih vaih erawh chuan kan ram politics tiṭawptu pawi tak a ni thei ngei bawk ang. Chuvangin, fimkhur taka Pathian thu kalh zawnga he programme hi kalpui lo turin sorkar fawng chelh mektu MNF party leh sorkar ka ngen tak meuh a ni.
Pathian duhzawnga kalpui dan tur kawng khat tê - hleih nei lo leh thlei bik nei lova he programme chhawrtute thlan a nih theih phah beisei chungin Pathian chang ṭhenkhat han tarlang lawk ila : -
2 Chro. 19:7-ah chuan "Chuvangin, LALPA hlau ula,fimkhur takin ti rawh u; LALPA kan Pathianah chuan khawlohna leh thlei bik neihna leh tham einate a awm lo a ni" tih kan hmu a. Thufingte 28:21ah chuan "Mi thlei bik neih hi a ṭha lo va" tih te, Deut. 1:17ah "Rorelnaah thlei bik i nei tur a ni lo" Jakoba 2:1ah chuan "Ka unaute u, kan Lalpa Isua Krista, Ropuina Lalpa chu ring chungin, mi thlei bik nei suh u" tia fuihna kan hmu. Jakoba 2:9ah chuan "...mi thlei bik in neih chuan in tisual a ni" tih kan hmu.
Hei bakah heng changte pawh hian thlei bik neih hi Pathian duh loh zawng a nih a tichiang thei bawk ang: Sam 45:6, Jak. 3:17 et al.
A chunga kan han tarlante hi Pathian thu a nih laiin SEDP kalpui tum danah beneficiary thlangtu atan party hman tum a nih dan te, CM kamchhuak aṭang ngeia Congress leh ZPM chhungkua he programme chhawrtu atana thlang ve lo tura kawhhmuhna anga ngaih theih kan han hre tlat mai hian rilru a kap deuh tlat mai a. Kan ram hi Pathian duhdan kalh lova kan kal theih nan he thu hi ziah ngei ṭulin ka hria a ni. Sorkar hian Pathian Thu aṭanga thlir a tum dan fel tawk lo a lo nei a nih chuan inlamlêt leh hlauh se ka duh takzet a, a ngen pawh ka ngen takmeuh a ni.
He sorkar flagship programme kalpui dan hian a tihchian tur langsar tak chu MNF hian Pathian duhzawng zawm hi a duh nge duh lo tihte Politics tithianghlim tulh tulh zawnga kal nge a duh a tiṭawp tulh tulh zawnga kal tih hi a ni. Chu chu mipuiin kan lo thlir zel dawn a ni.
- J. Lalbiaknia