SIKUL KAI A HUN TAWH LO MAW?

Kan fate hian kum hnih chhung chu sikul an kai ta lo a, heti reng reng chuan sikul nun dan ṭha inzirtir te, lehkha zirna lam hrim hrim hi a nihna takin an man dawn lo. Hei aia ngaih pawimawh ngai mah chu ṭhian kawm pawh an thiam tawh lo a, phone leh computer hmanga sikul kai an nih avang hian an zirlai chu thiam chin lo nei bawk mahse an hawiher hrim hrim hi a dik tawh lo hle.

Covid-19 avangin sikul kai theih loh kan tih laiin bazarah kan kal thei tho a, Biak inah kan inkhawm luih luih tho a, kan fate hi pawn chhuak ve lem lo mahse pawna chhuak ṭhin nu leh pa leh an u te nen inah kan cheng ho leh tho si a.

Kan hripui hi a chhuakin an kai chuan ina awm te an rawn kai chhawn ve tho avangin kan zavaia kan in khung a nih loh chuan zirlaite zirna ṭhuanawp rei lutuk hi chu pal ve ngam a ṭul tawh lo maw?

Hri reh hmak huna sikul kai tir kan tum chuan kan ngaihsan loh Vaiho kan tihte ai pawhin kan dawihzep zawk tihna a ni tawh a, tuna kan dinhmun hi chu 'Fimkhur' ni loin 'Dawihzep' rawng a kai tawh a ni.

Fin hmel takin kan inkharkhip rei bik a, mi dang zawng aia ti ṭha angin sorkar a in lan tir a, Lockdown rei ber leh zan Curfew rei ber kan ni a. Hri kai tamna state (population aṭanga chhutin) kan ni tho a, tunlai pawhin India hmar chhakah pawh hri kai tamna ber a lu nungin kan la ni zel a, kan inkhung deuh roh inkhung tak tak ngam tawh si lo a nih rau rau chuan sikul hi i hawng tawh teh ang u.

Sikul an kai loh hian fee kan chawi tho a, rualkhai lo zunga Online Class hian awmzia a nei thui dawn si lo.

Kan fate hmakhua kan ngaih avang hian sikul hi hawng ila, hri kai an pun phah ngei ang, chumi enkawl tur chuan inring zawk tawh ang u. A serious deuh an awm leh damdawi inah kal vat se, heti reng reng chuan kum 2022 pawh sikul kan khar leh mai dawn niin a lang.

- Sangi Pa