Tak tak ni lul lo se

Memeber of Legis­lative Assembly (MLA), Mizoram thar turte chu November 28, 2018 hian kan thlang dawn a, political party hrang hrangte'n candidate tur tifel thawkhat tawh mah se, tumahin official-in an candidate turte an la puang lo.

Political party rang hrang candidate turte chuan mahni bial chhung turah theihtawp an chhuah mek a, an bei ngawrh hlawm hle. Tlin tum ṭheuha in candidate tur an ni bawk a, candidate turte hi an thawkrimin, an ṭang hle a ni. Au hla hrang hrang an nei a, mipui hneh theih dan tur bera an hriat hmangin an tlangau mek a ni.

Political party pakhat president chuan a campaign-na lamah sorkar hna mi a tiam nasa hle niin thu ka dawng a, hei hi tak tak ni lul lo se ka va han ti em. Candidate turte'n au hla hrang hrang an nei a, engpawh lo ni rawh se an au hla chu, sorkar hna kher kher hi chu tumahin tiam lul lo se ka va han duh tak em.

Ka lo hriat dan chuan a chunga ka sawi candidate tur pakhat hi chuan gazetted officer thlengin a tiam niin an sawi hial a ni. Rilru a tina tak zet zet a ni. Sorkar hna hi chu a thiam thiam leh a tling tlingte chan tura ka ngaih laia, an party an sorkar thut chuan Chief Minister a nih dawn avanga a lo tiam a nih ngat chuan kei chuan ram leh hnam hmelma-ah ka ngai lo thei lo ang.

Tunah phei chuan tun hmaa depart­mental-a lak ṭhin hna engemawzat chu Mizoram Public Service Commission (MPSC) kutah dah a ni tawh. Sorkar hna hi tiam an lo awm tak tak a nih chuan hna latu atana Mizo mipuite'n kan rin ber MPSC hna lak danah inrawlh a tum tihna a ni dawn a, a va han pawi dawn tak em.

Sorkar hna hi chu a intiam a, intiam chiah kei chuan ka ngai thei lo. Miin theihtawp chhuahin a zir ang a, a hna dilah a tlin ngei theihna atan a inpuahchah tur a ni.

Chutiang ni lo a, tlin loh hlauh luat avanga sorkar hna tiamte an lo awm a nih chuan, sorkar pawngsual a tum tihna a ni ang a, ram hmangaihtu tan chuan thlan chi an ni hauh lo ang.

Contract intiamte pawh an awm ngei ang, hei pawh hi keic huan ṭha ka ti hauh lo. Sorkar hna intiam ai chuan a la pawm theih. Dan dik taka duhsak zawngte contract an pe a nih chuan thil sual a ni hauh lo a, amaherawhchu dan pela an pe a nih chuan thil dik a ni lo ang.

Politician-te hian an tlangaupui tura ka ngaih chu bial hmasawnna atana an thawh dan tur, ram hmasawnna atan an thawh dan tur, mipuite tana an thawh dan turahte a ni zawk.

Tin, MLA zawng zawngin in zat veka an neih MLA fund hman dan tura an ruahman pawh hi candidate-te'n an puangzar ngei turah ka ngai.

MLA fund hman dan tur an ruahman aṭangin enge an ngaih pawimawh zawng, tih hmasawn an tum etc. a hriat theih dawn a ni. A tawp kharna atan chuan tlin duh luat vanga sorkar hnathawk tiam an awm nia sawi hi tak tak ni lul lo se tih hi a ni.

- Lalremruata, Zemabawk