Vibrant Chakma Nation tiam hi MNF hian sawifiah ngei rawh se

Mizo rilru hliamtu leh tun thlenga ṭhangtharte rilru tina ngawih ngawihtu chu 'Mizo' National Front President Pu Zoramthanga an hmuahnaa MNF-in 'MNF Party Promise You a Vibrant CADC and a Vibrant Chakma Nation' tih banner intar kha a ni. Kha banner kha Mizo zawng zawngin kan hmu vek a, kan thin a rim nasa si a, Pu Zoramthanga khan, "Ka hmu ve miah lo," a ti e an ti a, kha kha ṭhalaite thin tiur zual tu a ni.

He banner intar hi MNF hian sawi pial tum eng ang mah se insawi mam theih a ni lo. Chakmate hnena Chakma Autonomous District Council chak tak tiamtu hi Mizo Hnam Run chhunga lawi ṭhinte an ni. Mizo ni si, Mizo hnam party in ti siin Chakma ram pek an tiam mai pawh ni lova Chakma ram leh hnam nung leh chak tak pek an tiam thu banner-a an tar chhuak ngam hi chu Mizo mipui thin tiur zualtu a la ni dawn chauh a ni.

Congress chu Vai pawl an ni a, Vai pawl mai pawh ni lo Chakma MLA neih ti chhuak tu an ni a, Chakma Minister pawh pe duh tu party an ni a, mipui pawhin ngaihdan chin tawk kan nei. MNF hi chu Mizo party anga in chhal an ni. he MNF hian Chakma awmnaa vote an zawng pawh hi Mizo thinlungin pawm harsa a ti tawh a, chumi belhchhah tura Chakma ram leh hnam chak tak din an han tiam mai hi chu "Kan lal theih dawn phawt chuan tih hreh pawh kan nei lo," an tihna tluk a ni. Congress-in lal theihna a niha tih hreh an neih loh zia finfiah zuiin BJP-te an va thawhpui thul, kan party liante chet dan hi hriatthiam a harsa hle a ni.

MNF hi Mizo mipuite hian an zawt a che u, "Chakma ram ropui tak tiamtu Party in ni em?" He zawhna hi Mizo mipui hian an zawt che u a ni. Central YMA chuan CADC hi ṭhiah duhin theihtawp a chhuah a, miin a theih loh ringin an sawiselin an nuihsawh deuh chung pawhun huaisen takin CYMA in ke a pen ngam a ni. Mizo hnam tana ding tura ngaih MNF berin 'MNF Party Promise You a Vibrant CADC and a Vibrant Chakma Nation' tih banner tar pawh an zak tawh si lova, MNF hian he thil hi an sawifiah a ngai a ni.

Central YMA khan General Con­ference-a ‘Dan lova din CADC hi dan anga ṭhiah ni rawh se,” an ti rup mai kha a ni a, CYMA kha chuan political party mitin thil a thlir lo. Mizo mit aṭangin a thlir a, CADC awm hi an hnawksak bakah a indin dan hi dan lo a lo nih bawk si avangin hei hi ṭhiah a ngai a ni, an ti.

YMA chu politics lama awn bik nei lo tur an ni a, he thu an rel hian politics an ngaihsak lova, MLA inthlan tur lam an thlir lova Mizoram leh Mizote ṭhatna chiah an thlir. YMA-in hnawksak a tih em em leh ṭhiah a duh em ema party lalna inchuh duh kan party lian pahnih an awm hi a thanat thlak a, chu hmuna Chakma ram ropui leh thiltithei tiamna banner an tar ngam hian rilru a tina a ni.

Mizote hian thil hi kan theihnghilh leh mai mai ṭhin niin kan sawi a, tun hmate chuan kan lo theihnghilh mai mai ṭhin a nih pawhin tunah chuan engkim mai hi document a awm thlap thei tawh a, tunah hian Mizo ṭhalaite phone hi en theih ni se he thlalak, MNF-in Chakma ram ropui tak siam an tiamna thlalak, chumi hmaa an President Pu Zoramthanga’n chawimawina pangparṭhi a awrh hi an la kawl fur ang. A chhan chu kan ram chhungah ngei Chakma ram hranpa din duhtu an ni nge ni lo tih hi huisen taka an sawfiah ngam a ngai a ni.

Mimawl (layman) chhutna aṭangin chhut ta ila, Chakma awm tamna bialah hian MLA constituency pahnih vel a awm a, hengte hi MNF hian chuh lo ngam ta se, chu chuan Mizo mipui thinlung hi a hneh zawkin a rinawm a, MNF chuan Mizo tan tiin Chakma seat chu an hlan (Sacrifice) ngam, tiin mipuiin MNF hi kan hnam party tiin kan vote sup sup tura rinna hi a awm a ni. Tunah chuan MNF ber pawhin Chakma vote a zawng mai ni lovin MNF hian tunah hian Chakma tana ram ropui siam a tiam a, chu chu lehkhaa sem darh satliah leh thusawinaa tarlan mai ni lovin banner lian tak an tar a, thla an la a, a mruka inhrilh pawh ni lovin an Party President thla an lakpui tir a, Mizorama Chakma ram a hranpaa siam tumna hi an nei a ni.

Thil hi ngaihtuah uluk a ngai a ni. Eng party pawh hian tlin an duh vangin theihtawp an chhuahin sum leh hun tam tak an seng ṭhin a, chutah chuan eng hmanrua nge an hman duh?tihte hi mi pangngai chin chuan an chhut thlap ṭhin. Mipuite retheihna remchanga hmanga pawisa hmanga vote zawng ṭhin an awm a, miretheite hmusittu an ni a, a ṭhenin Vairama an hotute sum leh theihna an hmang bawk a, tunah chuan MNF-in Chakma vote zawnna atan Chakma laka inphalrai leh inphah hniam pawh an hre ta lo mai ni lovin banner nen Mizoram mipui hmuhah an inpuang ta a ni.

Mizo mipui hian CADC hi an duh lo a ni. CADC hi a hnawk an ti a, chu chu tihtawp duhna a lian tawlh tawlh a ni. Chu chu tihtawp a theih loh a nih pawhin Chakma te vote duh vanga Mizo party anga inchhal siin Chakma ram ropui tak din an tiam hian rilru a tina ngawih ngawih a, he thil hi MNF hian ngawih bopui lovin Mizo mipui hnenah an sawifiah a ngai a ni. MNF hian he thil hi an sawi fiah duh lova an ngawih bopui a nih chuan Chakma ram ropui siam hi he party hian an tiam ngei tihna a ni ang a, Mizo mipui hnena vote zawng ngam tur chi an ni dawn em ni?

- KC Lalremruata (Terema)