Serchhip District hmar lam khuate an vanduai...

Serchhip District chhung, a district khawpui hmar lamah hian khaw 10 vel a awm a, chungte chu: Chhing­chhip sub town, Buhkangkawn, Chanin, Baktawng, Hmawngkawn, Khumtung, Hualtu, Hmuntha, Khawbel leh Thentlangte a ni. Serchhip District pum huapah hian khua 41 leh town 3 a awm bawk.

Serchhip khawpui chhak lamah Tuichang ralah hian sorkar hmun a awm nual a, Civil Sub Division te, BDO hmun te pawh a awm. Khaw thlang lam, Mat ralah pawh Civil Sub Division hmun a awm leh a, hmar lamah erawh thung chuan civil administration han kenkawhna tur hmun a awm ve lo. Hetiang a nih avang hian Serchhip District-ah hian Civil Adminis­tration hi a inkhairual lo em em a tih theih awm e.

Thil te tham deuhah pawh hmar lam khuate hi chuan Serchhip an pan vang vang a ngai a, hmun dang, chhak leh thlang lamte hi chuan awlsam tein an khaw ṭhenawm maiah an chingfel zung zung thei thung si a ni. Tihlaiin Police outpost pawh hi a inkhairual lo hle a, a khaw chhak leh thlang lama mite chuan police outpost an neih fir fer laiin hmar lama mite hi chuan Serchhip pan nal nal a ngai zel.

Education lamah lah Serchhip chhak lam leh thlang lamte chuan SDEO thuthmun an nei a, hmar lam chuan Serchhip pan zel a ngai. Ka sawi tak hmun dangten PWD leh PHE lamahte pawh SDO ṭhut hmun an neih fir fer laiin hmar lam khuate erawh chuan engmah an nei ve lo.

Power and Elec­tricity lamah erawh chuan hmar lamah hian Sub Station pakhat a awm ve a, mahse chutah pawh chuan thawktu an pachhe em em a, regular Junior Engineer pawhin ala ṭhutchilh bawk si lo nen. Tunah phei chuan Mizorama awm chhun Sainik Sikul pawh Serchhip hmar lamah Central sorkar chuan a han dah tawh a, hetiang a nih phei hi chuan hmar lam khuate hi ngaihtuah ve deuh a phu hle awm e.

Heng Sainik Sikulte ngat phei hi chu hnam chitin lenna sikul, sipai lam pawh engemaw zat awmna tur hmun a ni a, chuvangin dan leh hrai keng kawh turin Civil Administration hmun dah ve na awm hliah hliah chu a ni ta e.

Hmar lam khaw tinah hian Government Primary Sikul a awm a, Middle Sikul pawh a awm a, sorkar aided sikul pawh a awm vek. Heng sikulte pawh hian an mamawh engkim an lamna hmun chu Serchhip vek a ni reng mai. Higher Secon­dary Sikul lah ni se Mizorama a ṭha ber pawla ngaih helai area-ah hian a awm a. Kuthnathawk mite tan lah Agriculture hmun hma engmah hmar lamah hian a awm bawk si lova, chuvangin an mamawh, thlai lam enkawlna ang chi pawh Serchhipa lam a ngai vek mai hi chu a buaithlak a, an rethei ngawih ngawih mai zawng a nih hi!

Hetiang hi Serchhip hmar lam khuate dinhmun leh an harsatna a nih avang hian sorkar hian ngaihven ve vat se, Serchhip hmar lam khaw remchang ber awma langah hian Civil Administration hmun han hung ve ngei se. Education lama an harsatna sukiang tur hian SDEO hmun emaw chu han dah ve ngei bawk se tih hi helai area-te duhthusam chu a ni ta.

- Patrick Z, Chhingchhip