Chief Minister, Speaker leh Home Minister

Airport leh CM

ZPM ho chuan thuchhuah an siamah Chief Minister-in Lengpui Airport a tlawh tlut tlut mai chu Lengte rama a huana raw kui ṭiah a tlawh chhuanlam a ni mai mai ang em tiin an sawi a. 

Ka lo ngaihdan ruk deuh ngaihdan an nei. Thlawhna thlawh theih hauh loh lai a ni a, hmun danga hnathawh en lem loa Airport cheiṭhatna hnathawh a tlawh fo mai hian Lengte rama a huana 'hardening' kha a tlawh fo pawh a lo ni thei. Kan sawi thei lo. 

Ruaiṭheh tuk pawh sawi lova kawng chhawng tur endik kual te, stadium chhawng buaipui te, chaw a Mizo buh rin te, nuai thum sem te, AR sawn chhuah te, ramri chinfel etc. te kha tun term vek a la ni na in hmânlai an chang der tawh a, Airport aiin an ri ring lo vek tawh! 

Home Minister

Mize zawi leh pawisawi lo, ṭawng ve puat puat lo a ni a, Speaker a nih lai khan Speaker ṭha ber pawl a ni. Home Minister-a lakluh a nih lai khan iptepui leh Mizo thuam nen ngat chet a la a, 'a pui dawn e' kan ti rilru a. Hrileng buaina kan tawh chiah chuan state dangah Home leh Health changtu bakah CM an lansarh ber laiin keini state-ah chuan Home Minister nei lo ang maiin dan leh thupek a chiri a tih theih. 

Lockdown thlahdulna Guidelines chhuah reng laiin hmun ṭhenkhatah complete lockdown an puang a, ṭhenkhatah ui leh ar thlengin duty-ten an zuah lova, ramri duty ten mi vawk an kap thlu dur dur a, dawr khar hun lah chu veng tin deuhthawah a danglam bawk a. 

Dan leh thupek kenkawh dan chiri takin kan kal lawih lawih mek a ni. Amah erawh mi sual a ni lo. 

Speaker

Mi ri vut mai, vei tawh lamah chuan mawng hawlh ang zek zek ang niin an sawi a, hminghliauna nei deuh tawh mahse a tih lam lamah chuan thawm na tak chu a ni ve. 

Speaker zia a nei lova, Party rawng a hriat ṭhin a, a moderate lo. MLA ho a huikhawm aiin Party te te in a thliar langsar hle a, a line lo tawpa awm ang mai a ni. Pu Romawia te, Pu Chama te hi Speaker-ah chuan tluk lo tak a ni. 

Inthleng se

Speaker leh Home Minister te hi an chanpual (portfolio) inthleng hlawk se hma kan sawn zawkin ka ring. An chelh ve ve-ah an fail a, an bitum tur hi an ruat fu chiah lo a, chu chuan issue ṭha lo a siam zawkin a ngaih theih. 

Tlipna

Health changtu hi a ṭawng khauh khauh a, a sawi sual lo viau a, thu dik sawi dan tawk leh confidential vawn dan pawh a thiam viau. Thawhpui châk lo tak tak an pawlah an awm tih a lan laiin a tuang a chhah hlein a lang a, mipuite Minister-ah a in hlangkai a ni ber mai. 

Supply changtu pawh hi a ṭawng tam lo, a thawka thawk chi a nihna hi a hnathawhah hian a lang reng a, hun harsaah pawh hnianghnar takin min awmtir tlat hi tlak duah lo mahse fak tur mi a ni. 

Midang erawh an ṭawng chhunah an khak sual reng a, exer lâk pawimawhzia, sum dinhmun tuma hriat loh sawi khut khut te, pawl 12 exam tur exam leh loh tur tih te, Volley Ball Court siamna tur en, ramri duty tlawh tih velah kan ti fu hleithei lo thung. 

CM hian Agri­culture, Home leh Health changtute hi ṭawiawm tlat se, media a an lan rual hian lang ve thei zel se, heng zinga vuaicha deuhte tur chhuakin chhuah­pui lawp lawp fo se hmuh an nuam ang a, an thlamuan­puiawm leh zual ang.