Mipui hi an zahawm asin

Kan Chief Minister kal chhuak ta khan 'Ui Tang' tih ṭawngkam kha a lo hmang tawh a, 'Saipui kal lai' tih a hman te kha kan la hre ve ṭheuh awm e. 

Kha ṭawngkam khan Mizo mipui thinlung a ti na hle tih a lang a, chhan tam tak a awm thei tih hre chungin inthlana an tlak kha chuan rilru lamah hian a lo lang leh veng veng mai nia mawle. 

Tun hnaia mi­puiin kan sum dinhmun hre duha social media leh hmun hrang hrang aṭanga an au chhuah tawh hnua kan sum dinhmun min hrilh theitu berin, "Pathian chauhin a hria," min han tih khum hi chu kan Chief Minister kal chhuak ta kha rilruah a lo lang leh nghal nia mawle! Thil hi a lo mak thei khawp mai.

Democracy hi ka hriat thiam ve danin sawi fiah han tum chhin tawn ta ila mahni thiam dan danin - mipui an han awm phawt a, chumite chuan mipui zingah chuan "Ani hi a ṭha ber ang kan chungah hian ro rel rawh se," tiin an hruaitu tur an thlang ṭhin a, chu chu a ṭha ta lo deuhve an hriat hun hunah, "Hei zawk hi kan hruaitu ni leh mai rawh se, a ṭha leh zawk ang," an ti leh a, an nin deuh hunah, "A hmasa kha ni leh mai rawh se," an ti leh thei a, "A thar hi ni zawk law law rawh se," pawh an ti thei a ni. Mipui hi democracy ramah chuan an thu a ni tih kan hriat a ṭha khawp mai.

Rorelna lalṭhut­thlenga han ṭhut deuh vung tawh hi chuan tun hmaa kan thusawi te, tun hmaa kan ngei ṭhin te, tun hmaa kan tih chak ṭhin te, tun hmaa kan tih duh hauh loh te, tun hmaa kan thlir dan te, tun hmaa kan ngaimawh te, tun hmaa chapo nia kan hriat te, tun hmaa inngaihtlawm nia kan hriat te, tun hmaa kan ṭhiante nia kan hriatte leh tun hma thil kan thlir dan zawng zawng hi zuk danglam thei an tia nih chu mawle! 

Sawi duah ai chuan Mizoram hian mipui zahawmna hi kan hriat chian a hun tawh tehlul nen tun thleng hian kan la hre chiang lo a nih hi. Mipui hi an zahawm si a, kan duh duhin ṭawng khum lo ila, mipui hi i ngaichang ṭhin ang u khai. Mipui hi an zahawm ve a nia.