An hre lawk vek

Saitual khawpuiah Pu Lalduhoma'n tun hnai khan thu a sawi a, "R Lalzirliana hian District in nih loh tur thu hi kum kaw (9) chhung Home Minister a nih chhung khan a hre chiang lutuk," ti lam hawi zawngin thu a han sawi a ni awm e.

District duh vanga bang tur tan chuan ban na hun kha a tam si a, tun hnaia a han bang ta rup mai hi chu Saitual mipuite hmangaih vang nge MLA-a tlin leh hram dan a ngaihtuah vang zawk? tih hi lo ngaihtuah ve mai teh u.

Pu Zira tluka Congress-in Distroct an pe dawn lo tih hre chiangtu hi an awm lova, ban a tum lo reng reng a ni. Kum kaw chhung Home Minister niin department lian leh sum tamna a ṭhutchilh a, inthlan a hnaih takah dinna tur bial zawngin a vak kual a, Ralhlun lamah a kal a, Champhai a zin kual a. Durtlangah a zawng leh bawk a, seat a hmuh mai loh avangin saitual lamah bawk a kir leha ngai a, a dinhmun a ṭha lovin a hre tawh si a, MLA-a tlin theih dan ber tur ngaihtuahin mipui hre chiang tak chungin hei hi a kalpui ta hi a ang ber mai. Amah hi mimala in la duh chuan thlang tling ula, District pek duhtu in duh a nih chuan a pek duhtu a nih tak tak chuan inthlan hmaa ban mai awm ka ti deuh. Heng thil hi hre lawk veika kalpui an ni.

Mizote hi a nawlpuiin kan rethei a, Rs 100 pawh kan bawh huam huam duh a, Rs 1,00,000 tawktarh chuan mipui nawlpui hi a hip theih a, chu chu vote nena sawi zawm chuan mipuiin an duh dawn tih hi Congress puipate hian an hre lawk vek. Kan retheihna hi min leina atan an hmang ta a, NLUP-a pawisa an dah chu kan duh em avangin kan vote lo thei ta lo a ni.

MNF lamin, "A sema sem ringawt mai kan ram a chhe zo dawn e," tih a hnekin SEDP tiin pawisa tam tham sem an tum a, hei hi thil theih loh a ni tih an hre lawk vek. Mizo mipui hetiang zat tana Rs 3,00,000 sem tum hi a theih loh a, a theih dan min sawi hmuhtute hian kan dawng tak tak dawn lo tih hi an hre lawk vek a ni.

Tin, tuna thil kal danah chuan 'unemployment allow­ance’ an pek tur thu MNF President khan a sawi a, ani pawh khan a theih loh thu a hre lawk vek.

ZNP ni ṭhin tuna ZPM in ti tate pawh hian MPC bakah mi ṭhahnemngai tlem te an neih belh hian an sorkar thei lo tih hi an hre lawk vek, thawm lian tak siam hian mipui hmaah awihawm taka lan hi an tum ve mai mai bawk a ni. Politician-te hian mipui hi a bum theih tih hi an hre lawk vek.

- Lalthanmawia, Tuikual