HNAM PASALṬHATEN ZORAM AN DIN HUAL

Hnam dangten an neih ve phak loh tlawmngaihna Mizoten kan nei hi a van hlu em! Bible a hmangaihna nun ze ropui chu tlawmngaihna nunzia chuan a huam tel vek emaw tih mai tur a ni. Tlawmngaihna nunzia hi kei tehlul hian ka sawi fiah zo dawn lo a ni. 

Tlawmna nun te, huaisenna te, tumruhna te, tai­makna te, thuawih­na te, thawhrimna te, phut let nei lova midang tana thawhna leh inpekna te hian tlawmngaihna a tuam mawi a, a par chhuah tir ṭhin. 

Pasalṭha Taitesena te, Khuangchera te, Vanapa te tlawm­ngaihna chuan mite hriat hma hauhin phut let nei miah loin ṭanpui ngaite an pui a. Chu tlawmngaihna luang chhuak chuan tawp chin nei loin mite tan an luang ral ṭhak ṭhin. 

Tunlaiin hripui leng lakah Mizoram a him theih nan kan ṭhalai rualte chu ramri duty leh veng tluanah an rammu a. ‘Ram leh hnam ka chhanchhuah ve theihna a nih chuan eng anga hrehawm pawh lo thleng se tawrh ka huam e’ tiin mahni in lum chhuah sanin thosi leh vangvat zingah ruahpui leh thlipui lo haw laiin riahbuk sual chawpin ramri-ah chhun zan zawnin Zoram an veng a ni. 

Heng kan hnam pasalṭhate hian hnam chhan nan tlawmngaihna thin­lung an neih chinah chuan mahni in luma tawm reng thei niin an inhre lo.  

Eng anga hreh­awm pawh an hmaah lo thleng dawn mahse chung te chu tuar zel inhuamin kan ram tan an pen chhuak a ni. Mizo mipuite thlamuang taka kan awm theihna te, hripui lakah kan la him zelna te hi an thawh rah a ni. 

Kan tan chuan an hlu a, heng ṭha­lai rual kan hnam pasalṭhate hian kan pi leh pute nun hlu tlawmngaihna nun ze ropui mual liam tawh hnu chu an rawn din thar leh ta a nih hi. 

Anniho hmaah hian tunah rih chuan Taitesena te, Khuang­chera te, Vanapa nun kha kan ngai tawh bik lo e. Hmanlai Mizo pasalṭhate kha lo tho lehin rawn hmu ve ta se an thil tih hian a va tilawm dawn tak em!