HMAITHINGHAWNG
He damchhûng reiloteah hian kan hun a tam loh tehlul vei nen kan hun tam zawk mah tur hi kan nihna lo pui anga inlantir nan, hmaikâwr vuahin lemchan nan kan la hmang ta dah a! Hmaichhanah kan rilru ni miah lovin kan infak ar ek chiam chiam a, hnunglamah kan inrêl leh a! He lemchanna hmaikawr hi chu a va huatthlala mai mai tak em tiraw?
Politics khawvelah te hian hmaikawr hi kan vuah nasa mange aw! Mipui rin kan hlawh theihna tur a nih dawn chuan leh, kan tlin theihna tur a nih dawn chuan patling nutling hian hmaithinghawng vuahin, anmahni pawhin an awih tak tak ngut ange maw tih tur khawp tawngkam maksak pui pui hi kan chhâk chhuak duh a. Kan thusawi dan ki kan thlâk zûr zut a. Sangha man tum ang mai hian an thusawi dik leh dik lohah man han tum ila an tâl put zung zung a, hmun dangah an pakai zung zung a. Mipui lah hi kan bum fin theih der loh lehnghal a!
Kohhran rawngbawlna thleng pawh hian hmaithinghawng hi kan vuah ta zel emaw tih tur a ni. Rawngbawltu tha awm taka lang, mahse kan nihna dik tak hriat hleih theih loh, thup leh zêp tit tet ngai fawmkem hnem ve tak, a sawi lamah chuan mittui ko chhuak thei khawpa hnûnhnâng, mahse nun lama zir tur leh hmuh tur awm si lo hi kan kat ve nuk a. Hei vang hian kan thusawi te pawh hi a nung hlei thei lo fo a, a thawh tur angin hna a thawk thei lo fo em tih palh a awl ta hle mai. A sawitu nun leh a thusawi inpersan thin hian khawilai nge man tur leh awih tur tihah harsatna min siam leh thin.
Thenkhat hi chu insawi rinawm hi kan han tum khawp a, "Dawt sawi hi ka thisenin a ngam thlâwt lo" ti reng chung hian mit khap miah lo hian kan daw par par thei lawi a! "Mi rêl leh an chanchin tha lo sawi hi kei chu ka duh ve lova" ti reng chung hian tute bulah emaw chuan kan rêl ru leh sup sup tho a!! Kan han inhre chiang deuh a, "Ka rin i lo ang lo hle mai. Parte, ka ti tawh lovang che Biaksailo!" tiin kutzungchalin kan inkâwk leh sawk sawk thin a nih hi. He lemchanna hmaikawr hi chuan min va bum thei tehlul em!
Chutiang bawkin ram leh khawtlang emaw, chhungkua leh mimal tana thil tha i tih duhna thinlung kha thup leh zêp lovin auchhauhui bawrh bawrh rawh. I hun a tam tawh lo maithei a ni. He kan damchhung reiloteah hian a tam thei ang ber thil tha hnutchhuah tum ve ila, thih hnua fakmawi chawp leh kan thiltih that zawn khawm chawp ngai lovin, kan thiltih leh thusawi emaw, midang tana thil tha kan tih te, kan rilru chhungrul ngaihdan leh pawmdan, midangte nunkawng dika hruai theite chu zahpui hauh lovin i auchhuahpui bawrh bawrh ang u. Kan chhungrila thiltha tih kan duh tam tak ti hman lovin mual kan liam palh ve thei a nia. Nun hi a tawi em hi!
Hawh u, kan damchhûng hi a rei dawn si lova, engtikah emaw kan chatuan hmunah kan la haw thut vek dawn si a. Kan damchhûng reiloteah tal hi chuan kan lemchanna hmaithinghawng hi hlip ila, kan rin êm êm, kan innghahna tia kan lam rik âwl loh kan Bible sawi ang hian "Chutichuan dâwt sawi bânin, mahni thenawm hnenah thudik tak sawi theuh rawh u; inpêng tawn theuh kan ni si a" (Eph 4.25) tih hi chhiar liam mai tawh lovin a takin nunpui theuh ila, he Zoram, Kristian ram tia chhuang taka kan chhâl hi a va nuam lehzual dawn em!
Hawh u, kan lemchanna hmaikâwr hi i hlip daih ang u.
- PC Nghaklianmawia