AWM LO TA LA

A KAMKEUNA

Nula tlangval inlêmna hla K Hminga phuah 'Awm lo ta la' tih Sangtei Khuptongin thin lairil ber fan chhuak thei khawpa a sak han ngaih­thlak chang hi chuan zantiang chhawrthlapui êng no nghulh hnuaia Mizopa ṭingṭang tuk chawp kuaha Nl. Pensy B. Lalthangliani ianga zãi kal vawng vawng paha bialnute hriat tura an kawmthlanga kan han insaipuk ṭhin laite kha min ngaihtuah chhuahtir ṭhin.

A di duh lai, duat lai leh a hmangaih ngawih ngawih chu awm lo ta se a hringnun a nguaiin a hlimna a chuai ang a, awm lohsan ta phei se'ng chuan a thinlung a hliam rualin a marphu a hniam ang a, khawhara thâmralin lunglengin a zâm ral mai dawn a ni tih hlain a chham chhuak a ni. Awm lo ta se a zuna uai tan chuan a va'n pawi dawn vawng vawñg tehlul êm!

AWM LO TA SE

December 10, 2019 aṭang khan hripui rãpthlàk mak danglam tak, khawvela la thleng ngai lo Covid-19 SARS-CoV2 chuan khawvel min nuai a, hnamtin, chitin run loh a nei lo. Jan 31.01.22 thlenga hripui vei tawh chu mi vaibelchhe tak 3,75,241,633 an tling tawh a, Covid-19 avanga nunna chãn zat chu mi maktaduai 5,681,747 an tling tawh.

Mithiam rualte'n theih­tawp chhuaha a damdawi an zawn hnuah pawh a damdawi bik bul fuk tak an la hmuchhuak hlei thei lova. Kum 2 zet a ral hnuah pawh hripui chuan kian zai reng a la rel thei chuang hek lo.

Mahse, vanneihthlak takin Covid-19 SARS CoV2 hripui kai theih laka invenna (vaccine) chu American company Pfizer-BioNTech leh moderna-te chuan an hmu chhuak hlauh mai.

Tichuan, SARS-CoV-2, virus laka invênna chu December 11, 2020 khan a hmasa ber atan Pfizer vaccine chu emergency-a hman atan Food and Drug Administration (FDA), USA chuan a pawm ta a. Dec. 14, 2020 khan mi nuai thum (300,000) zetin nunna an chãn phah tawh hnuah USA chuan a ram pum huapin vaccine pek runpui a kalpui ta rup mai!

US mi zingah Sandra Lindsay, Long Island Jewish Medical Center chuan vaccine hi a dawng hmasa ber a; kum 90-a upa Margaret Keenan chu United Kingdom a hripui tuar zinga Pfizer-BioNTech COVID-19 vaccine dawng hmasa ber niin Dec. 8, 2020 khan vaccine pek a ni. Mi langsar zinga Covid vaccine zoom kal tlanga campaign hmasa ber chu New York nurse Sandra Lindsay a ni.

India ramah pawh Bharat Biotech leh Serum Institute of India Pvt Ltd) Company-te chuan hlawh­tling takin Covid-19 SARS CoV2 vaccine Covexin leh Covishield an rawn hmu chhuak a, kan van vannei êm!

Jan. 16, 2021 aṭang khan India pawhin ama siam ngei Covid-19 vaccine pek runpui a kalpui ve ta. India rama Covid-19 vaccine dawng hmasa ber chu bawlhhlawh paihtu (sanitation worker) Manish Kumar a ni.

Mizoramah chuan Pi Lalthlamuani, grade-IV Aizawl civil Hospital-a thawk chuan vaccine la hmasa berin a rual hian senior doctor 10 Pu Lalhmu­­chhuaka, Supdt, Aizawl Civil Hospital hovin an la.

Tunah chuan khawvel puma mihring cheng zawng zawng aṭanga zaa 61% te'n vaccine hi an dawng tawh a, dose billion 10.08 hmanral ni tawhin nitin 23.08 million vaccine pek an ni. India hian a ram mipui zawng zawng chhuta 68% vaccine a pe tawh a, Mizoram bikah dose 1na la 8,10,082; dose 2-na la 18,626; precausion dose la 18,626 awm tawhin a vaiin 14,40,715 an tling tawh a ni.

India ramah mi vaibel­chhe 4 chuangin Covid-19 an vei tawh a, mi nuai 5 dawnin an thih phah tawh. Mizoram bikah mi nuai 2 dawnin an vei tawh a, mi 600 chuang zetin an thihpui. Khawvel huap emaw, state khat huap emaw pawh ni se, Covid-19 SARS CoV2 laka invenna vaccine hmuh chhuah ni lovin tun thleng hian vaccine pakhatmah 'awm lo ta se' mi zawng zawngin hripui kan kái anga kan vaiin kan pul vek ang a; in vuiliam tur pawh kan awm kher lo maithei! Covid-19 vaccine hian mi tam tak a chhan chhuak tawh a, na zual lutuk tur engzatnge a tuar nêptir a ni.

A TLÃNGKAWMNA

Thiamna a sang tial tial a, natna khirh tak tak, hmingthar vuah chawp ngai pawh a tam tial tial bawk. Covid-19 pawh a thawhkhatna, thawhhnihna leh thawhthumna thlengin hming hran hran vuah ngaiin a rawn insiam dang­lam a, Omicron thlengin a lo chhuak. Mahse, Pathianin mihringte thiamna sang tak a pek avangin Covid-19 vaccine a lo awm hlauh a, chu chuan mi tam tak nunna a chhan chhuak a ni.

Covid-19 vaccine hi awm lo ta se, hringmite nun a nguaiin a chuai ang a, hringnun marphu a hniam ang a, lusun lungngaiin kan awm dawn a ni. Vaccine hmuchhuak thei tura hring mite thiamna leh finna petu Pathian ropui chu fakin awm rawh se. Amen.

- Dr. C. Lalrampana