Engvangin nge sorkar hnathawh hlawh kha an pûk?

Covid hluar chhoh lai tak khan Mizoram sorkar chuan Chief Secretary kal tlangin sorkar hnathawk pawl hrang hrang an ko khawm a. Sorkar sum dinhmun a chhiat vangin Covid dona atan sum thawh khawm a ṭul thu thiam takin sorkar hotuten an sawi a, sorkar hnathawk hlawh hmangin Covid kan do kha a ni ber a. Kha tih lai khan SEDP tur sum hi an lo thukru char char em ni ang aw?

Khatihlai tho khan stadium siam leh phul lem phah chu kalpui a ni a, mau chi supply tu an ko thova, Lengpui Airport siamṭhatna atan a maka maka tam pawisa an pe chhuak tho.

PAHOSS hnuai­ah pawisa a luang chhuak bawk a, chuti reng reng si chuan pawisa nei lo leh khawro ngawih ngawihah kan sorkar kha a inlantir vel a, tunah hian pawisa neih loh vanga post hnawh khah theih loh thu sawi leh SEDP sem sawi inkar chu kar thum pawh a tla ta si lo.

SEDP hi chu cheng nuai 3 tur a ni a, sing 5 dawn hi chu thil inhmeh lo tak a ni. Kan fapate hnenah Swift car leisak intiam zeta, Scooty lei ang chauh a ni; pek loh aiah chuan an la ve anga mahse an lawm dawn si lo.

Heti zawng hian ngaihtuah ve rawh le, Mizoram sorkara hlawh tlem pawh tura ngaih pawh hian a ngheta an thawh chuan sing 4 sing 5 an la phak tawh a, kum 5 chhunga mahni vote tute tana sing 5 lek pek hi ka hrethiam lo, constable pakhat thla khat hlawh zat vel hmanga SEDP sem hi a mak a ni.

A tlem emaw a tam emaw sem tur an nei a nih si chuan engvangin nge mipui aṭanga CM Relief Fund Covid atan an khawn khawm? Eng vangin nge sorkar hna­thawk hlawh an pûk tuna sem tur nei leh tho si?

Kan sorkar hruai­tute hi an sual ka hre lo, mahse sum enkawl dan kual vel hi chu inennawn ve deuh chu an ngai. Tunlaiah ṭhalaiten mi state kal dan kan hmu ve phak tho sia rual awh a na a ni.

- Johny LR Mawia