MNF insawifiahna Fiah ta lutuk hi!
Tawnhriat nei chung pawha fimkhur loh rah hian, thil duhawm lo tak a thlen thei a. Chu chu Vanglaini chanchinbu kal tlangin kan lo hmu ta a nih hi! Vanglaini phek hma berah, CMO insawi fiahna kan hmu a, hei hi a pawimawh lo.
Phek hnihnaah, 'CM Zorama puhna MNF-in sawi fiah' tih zawkah erawh, a pawimawh ta hle. MNF lam hian an mawng an hlim ta tlat a nih ber hi. Eng thu nge kan hmuh? Abu Majumdar-a hian Delhi tlângah Assam CM hi thlen khalhin, an State House lam pan ta lo chuan, Mizoram House-ah Mizoram CM leh a ṭhuihhruaite a va hmu hmasa ta hlauh a!
MNF thuchhuah chuan, Abu Majumdar-a hi an State House lama thleng turin CM leh amah ṭawiawmtute hian thu an lo rawn tih an sawi tak deuh deuh a nih hi! An tum loh tawpin MNF hian mahni mawng an hlim tih kan hmu thiam em? Abu Majumdar-a hian Mizoram House-ah thlen a tum tih hai rual a awm lo.
Eng vangin nge Abu Majumdar-a hian mahni State Inpui lama thlen tum lo a, kan Inpui lama thlen tum ngawt nge a nih? Mizoram House lamah hian hmuh tur mi pawimawh a nei tihna a ni. Eng thilah nge chu mi pawimawh chu hmuh a va tum tih pawh, ngaihruatna kal tlangin a hriat theih ruak awm e!
Majumdar-a hian kan CM hi hmuh pahin, kan House lamah innghah nghal a tum tih a lang chiang viau lo em ni? Eng vangin nge Mizoram House-ah Majumdar-a hian kan CM hi a va hmuh mai theih? CM hmuh awlsam lem lohzia hretu tân chuan, Majumdar-a hi sawm kal a ni ngei ang tih a rin theih hliah hliah!
MNF insawi fiahna kal tlanga kan ngaihruat theih tak chu hei hi a ni. Majumdar-a hian kan CM hmu turin, Delhi a pan vang vang a. Ngaihruatna vekin kan CM leh Majumdar-a inlaichinna hi, Assam CM hian eng emaw chen chu a lo hriatpui ve bawk. Ngaihruatna vekin, heng mi pathumte hi, kuhva tawlhrûkah an inkunglaih a niawm mang e!
I ngaihtuahna lo seng zui ve tawh mai rawh le. Kan CM leh Assam CM inlaichin rûkna niawm tak, Tv Awmtea'n a lo puan tawhte kha kan la hre reng em le? MNF hian insawi fiah an tum lutukna lamah, kan hriat phâk mai loh tur thurûk, ualau takin an puang dur mai a nih tak hi!
Chief Minister Office (CMO) insawi fiahna kha, MNF Party hian duhtâwk mai se. A hranpa taka Party anga insawi fiahna lo neih a ngaih tawh loh nen, an tum loh deuhin an nihna thurûk, a chhiar apiangin an hriat theih turin an puang lek fang a ni si a!
- Lalremliana Pachuau