Ka ngaihdan min zawt maw?

Hetia entre­preneurship lam kum 30 zet ka lo buaipui tak hnu hian mi engemawzatin an fate hma lam hun atana an kalna tur min rawn zawt ve ṭhin a. Ka chhanna ngai reng, ka chhan zel dan tur chu hetiang hi a ni:-

1. Sorkar hna­thawk ni si, an khawsak a nawm viau a, an chet theih viau chuan an hlepru emaw an eiru emaw tihna a ni.

2. Sumdawng emaw contractor emaw supplier emaw pawh nise kum reilote chhunga an hausak rup rup chuan dik zik tluak lovin sum an hailut tihna a ni.

3. Entrepre­neurship kawngah chuan hausak thut a awm thei ve lova. Zawiawiin, muang fan raihin an ṭhang lian ṭhin. Ram dan leh hrai palzut lo mai ni lo, dan ang thlapin a kal ṭhin.

4. Entrepre­neurship kalkawng­ah chuan taimakna leh remhriatna a inkawp. A zahawm a, chapo ni si lovin mahni induhtawkna an nei. Dik taka hausakna pawh a awm a ni.

5. Hausak thut emaw a kalkawng chu a thianghlim emaw a thianghlim lo emaw ngaihtuah lova, dan piah lam pawh pawisak nei lote tan erawh Entrepreneurship kawng hi chu zawh chi a ni lo.

6. Entrepre­neurship-ah chuan itsikna a awm lova, huatna a awm lo. Midangte pawh chance a siamsak zawk ṭhin.

7. Mahni ei hmuh­na a ni a, mi­dang­te eizawnna siamtu a ni bawk. Hna zawngtu ni lovin hna petu a ni a, amah Entrepreneur chu Boss a ni.

8. Entrepre­neurship chu ram hmasawnna khawl­­pui (engine of growth) a ni a. Entre­­­preneur tamna hmun apiangah ram a changkang ṭhin.

9. Entrepre­neur­ship kalkawng chu miin an tih avanga ti ve ringawt lovin, ama tuina, nuam a tih zawng, nui bawk bawk chunga hah hre miah lova a tih theih tur ngaihtuah chunga hmalakna a ni. Mi la tih ngai loh, thil thar ngaihtuah chhuahna kawng a ni a, chona hma­chhawntu a ni.

10. Entrepre­neurship chu 'risk' a ni a. A hlawhtling dawn nge dawn lo tih hriat ni lo mahse, â takin risk a la ngai lova, chhut lawk sa thlapin a kalkawng a thlang ṭhin.

Duhsakna ka hlan a che.

- Joseph L. Ralte