Social media hmangtute hnenah thuchah

‘Social media’ hi sap ṭawng nimahse kan hre vek awm e. Mi tin deuh thaw ban phakah a awm tawh avang hian thu leh hla pawh nasa takin a pian belh a, hei hian kan ṭawng hi eng angin nge a nghawng ngaihtuah ngun a ṭul hle. 

Ṭhalaiin kan hman nasat chu Instagram a ni a; followers leh likers ngah nih te hi a hlu. Thu leh hla ril leh mawi tak tak te, thlalak nalh tak tak leh sexy tak tak te thlenga kan pho chhuah chhan hi eng dang ni loin miin min hria se kan tih vang a ni a, sum pawh a lakluh theih a ni. 

IG-ah ‘caption’ kan siam te, kan ‘comment’ te, thu leh hla ril kan ziahah te hian a dik thei ang berin ziak hram hram ang u khai. 

Talent ṭha tak tak in nei a, ṭhalai tam takin kan follow che u a, ṭawng in ziah dik loh leh intihsual hian keini hian intihdan entawnin kan tisual ve zel dawn a. Chuvangin, a dik thei ang ber leh a tha thei ang bera ziak tur leh zir tlak ni turin kan ngen che u a ni. 

YouTube Channel neitute leh thawnthu ngaihnawm tak tak min chhiar sak ṭhintute u khawngaihtakin Mizo ṭawng dik chauh hmangin thu leh hlate hi min hlui zel turin kan ngen a che u. Ṭawng pawimawh­zia leh hlutzia hretute in nih kha. Thawnthu ngaihnawm leh thil bengvarthlak tak takte min hrilh a, kan va lawm ṭhin em! 

Fb leh WhatsApp lama thu ziak ṭhinte u - in thu leh hla ziah te hi chhiartu kan tam a nia. Chuvang tak chuan ṭan han la leh zual ula, Zoṭawng dik chauh hmang turin kan ngen a che u. 

In ziah dik tawk loh emaw hawrawp kim lo taka in ziah palh te hian ziah dan tur leh hman dan tur dik emaw kan tih mai hi a hlauhawm a, Zoṭawng ziah dan dik taka ziak zel turin kan ngen a che u. 

Pathianin talent hlu tak tak a pek che u hmanga ‘social media’ lama kan tana in luan chhuahnaah lawm thu kan sawi a. In talent ropui tak takte hmang hian kan ṭawng - Mizo ṭawng chhe zel tur leh kan hman dik tawk lohte hi min siam ṭhat pui tur leh kan ram leh hnam min humhalh pui turin kan sawm a che u.