Rinnunga'n rinna nung min pe se

Khawvel mihring tamzia ka ngaihtuah a. Ram dangin infiamna lama hma an lâk nasatzia ka ngaihtuah a. India ramin ram dang kan la phak loh nasatzia ka ngaihtuah a. India ram state dangte laka Mizoram state la hnufualzia ka ngaihtuah bawk a. Chutih lai chuan Argentina khawpui Buenos Aires-a Youth Olympic Games-a Mizo tlangval, Jeremy Lalrinnunga'n rit in­chawisiaka gold medal a la tih ka hriat hian ka mittui a tla hial a ni. A ropui lutuk.

“Kumin April thla khan Uzbekistan-a Asian Junior Championship-ah silver medal a la a, India tan record thar a siam tawh a. Khami tum khan Facebook kal tlangin kan inbe nual a. Tun tumah pawh hian Argentina rama a awm lai ka zuk be leh a; lawmpuina thu ka thawn a. Ka chanchinbu enkawla tarlan tur a thlalâk ka zuk dil bawk a.

Maradona te ram, Kum­pinu meuh pawh do rap rap ngam, khawvêl ram langsar Argentina ramah Mizo rawltharin kan ngaihsan sâpho zawng zawng pawh dah 'nil' a gold medal a la hi a ropui ka ti lutuk a. Lawmpuina thu ka thawn rualin ka mittui ka dang zo lo a ni.

“"Summer Olympic-ah pawh min tilâwm leh rawh aw..." ka ti a, ka mittui ka khap per sawk a. "Ka lâwm e. Theihtawp ka lo chhuah zêl ang," a ti.

“India hian Youth Olym­pics-ah hian an chêt that ber tumin Silver medal pahnih an la ve tawh a. Mahse, chu chu Mizo tlangval Lalrinnunga tel ve hma a ni. Kuminah chuan Mizo tlangval a tel tawh a, thil a danglam a ni.

“Ni, heti hian ka ngaihtuah: He kan Zoramah hian thalai tam tak, tih tur leh thawh tur nei lovin kan awm suau suau a. Mahni awmna hmunah kan pawr êm êm a, social media-ah a dik a dawk thlu lovin kan hmuh apiang kan forward sup sup a. Facebook group ho deuh deuhah kan insehmur tuau tuau a. Tawngkam feikibar hmangin kan inhawlh sawk sawk a. Chutih lai chuan kan ram hruaitute lahin mahni pumpui tanghma hai tih hriat lutukin an awmna hmasa chhuahsanin ram thar an chuan a. Hmana haw êm êmtute ngei khan parthi nen an lo hmuak a. An rel phar loh chauhte kha an lama an tan tâk mai avangin an tha leh ta thut emaw ni dawn ni; fak theihtawpin an fak leh a. Nilengin an paw lo chauh a ni ber mai!

“Chutiang chu a ni a, kan ramah hian Mizo Kristian dik takin ro an rel chung pawhin rih artui phur ang maiin thenawm state-ten min kalsan sung sung mek a. Retheite chu kan retheih lehzual nan sum sem kan ni a. Kan lawmna tur chin ni-a an hriatah kan pute hian perh min tarsak a, chumi ban pha tur chuan an duh apiang tihtir min tum mek niin ka hria.

“Zoram kalphung hi thlir ila, mipuite neih chhun chu beiseina a ni a, kan chan erawh beidawnna a ni mek a ni. Ram dang tluk lovin kan inhria a, mi tih theih ang ti ve thei lo niin kan inhre mek a. Ram danga an neih angte chu nei pha ve lo niin kan inngai tlat tawh a. Kawngpui tha chu kan ban phâk ve lo niin kan ngai a, ram hruaitu tha pawh kan neih ve tur niin kan hre lo hial tawh.

“Mahse, a ni lo. Mizote hian khawvêl ram danga mite hi kan tluk a ni satliah lo, an chungah kan awm thei tih hi Lalrinnunga, Lalmuanpuii leh Lalneihthanga-te nupa fa hian chiang takin kan mit hmuhah a rawn tar lang a nih hi.

“Vaiho aiin Mizo tlangval a chak zâwk tih a lantir a, sâp leh awze mite aiin Mizo tlangval a ropui zâwk thei tih lantirin, dawhsan sang berah rangkachak tangkapui nen hnehna a puang a ni.

“Kan ram kalphung hi her dik niin, hmangaihna nena enkawl ni phei ila Mizo nula leh tlangvalte hian khawvêl hi kan ngam nasa dawn ni hian ka hria a. Rinnunga'n a rualpui khawvêl râwlthar dang zawng zawng rap beta hlawhtlinna dawhsanah hnehna hlado a chham theih chuan; Zolawma leh Nunhlimi te tan pawh rangkachak tangkarua hi dahin a awm tih hi a chiang êm êm a ni.

“Lalrinnunga hnehna chan hi a ropui lutuk. Mizo tawh phawt tan lawma zuan tawr tawrna tur a ni. “Rinnunga hnehna hian Mizo thalaite thinlungah khawvêl kan hneh thei a ni tih rinna nung min pe ngei se a va lawmawm lehzual dawn tak êm!

- Hriatpuia Pa, Kolasib