CK hi...

CK hi Mizo ṭha­lai, WhatsApp leh Facebook khawih ṭhin te chuan kan hre vek awm e. Mizoramah chauh pawh a ni bik lo a, khawvel hmun dangah pawh heti zawnga WhatsApp leh Facebook leh Social Network a inbiakna hi a mikhual lo a, in­ngaizawngte inkarah te, inngaizawng kher lo - pawmlai nei reng - ler ve hrim hrimte inkara inbiakna hluar pawl a ni ti ila kan sawi sual lo mai thei.

Kan ‘ck’ hian thu hi tisa-ah a chantir a, chu chuan nghawng ṭha lo tam tak a nei. Heng avang te hian HIV/AIDS vei emaw a thehdarhtu emaw kan nih phah thei. Chutih rual chuan nula tlangval inngaizawng, heti lam hawia inbe ngai lo tam tak kan awm a. Chungte chu an zahawmin an tlo nge nge zel a, nupui pasal a innei a chhungkaw hlim tak din ta hi a tam zawk an ni ngei ang.

Nula i nih a, zan rei tak thlenga i online chuan mipa tuemaw lo biak ‘ck’ tumtu i tawng ve tawh ngei ang. A bik takin zanlai pelh tawh hnuah phei hi chuan nula te hian inbox lamah heti ang lam hawi a inbiak tumna hi a mikhual lo hle. WhatsApp lamah pawh heti anga min beiseitu mipa hi kan tawng fo a nih kha; in ngaizawngte inkarah pawh a mikhual lo.

Nula te u, hei hi hre reng rawh u - i bialpa in biak ‘ck’ reng che a tum a nih chuan a nupui ni turin a duh tak tak lo che tih hi pawm la, i tisual tam lo ang. Sex leh hmangaihna hi a hrang hlak a nia. Heti lam hawia in inbiak fo chuan thu hi tisa-ah a chang thuai ṭhin.

Tin, biak ‘ck’ mai mai atan chauh i bialpa khan a duh che a nih phei chuan i chan a chhe khawp ang. Tin, nangmahin i zir hmasa a nih chuan mipa i dem ringawt thei bik lo ang. ‘Ck’ pui mai mai tlak lek hmeichhia i nih chuan tun aṭangin insiam ṭha la, i nun uluk sauh la, i inchhir lo ang.

Mipate pawh hi kan fimkhur a ngai. Hmeichhe online rei nazawng hi va biak ‘ck’ tum ringawt loh tur. Tun laia an ‘screen shot’ hmak hmak a, group-ah te an ‘post’ in mipa tan mualphona leh kan zahawmna zawng zawng hlohna a ni. Bakah heti lam ringawt kan bialnu te chungah rilru kan pu a nih chuan kan inenfiah a ngai hle.

Hmeichhiate hian sex aiin inghahna tlak mipa an duh zawk. Heti lam hawia hmeichhia kan be nghal a nih chuan kan zahawmna a bo a, mipa zaktheilo tak nih bak kan hlawh lo.

Tin, ‘ck’ loin hlim takin a inkawm theih a, kan inhmangaihna hi a pung thei a nia. Nula tam takin - mipa fel tak tak leh smart tak tak nia an hriat te pawh heti lamah hian kan duap ru fu a ni tih hi an sawi fo mai.

Kan nun tak tak lan chhuahna pawimawh tak chu tumah min hmuh lohnaa kan awm danah hian a ni ṭhin. Chung huna nangmah hre chiang bertu che chu i ‘ck’ pui ṭhinte kha an ni a, ngaihdan tawk che leh teh dan tawk che an nei tih hre reng rawh. Thu chu tisa a lo chan a, sual a nih hma hian sim la, insiam ṭha ang che.

- Rinfela Zadeng