KAN HMACHHUAN TUR CHU ṬAWNGṬAINA NI ZEL RAWH SE

Tun thlenga hripui ṭaidarh lova, him piala kan la awm chhan hi, kan fimkhur luat vang kan ti thei em? A teuh lo mai, tangkhang haw runpui kan lo inhmuah dante kha, rel station platform ṭha la nei ve ta lo chu, a lo hmuaktute kha, rélin a tlan pel ruak ruak mai a nih kha. Kan ṭhenawm Manipur-te chuan felfai takin, eitur pack ṭha tak nena lo hmuakin, social distancing ṭha lutuk maintain chunga an lo hmuah dan, social media-ah kan hmu thei. Mahse maw, khati khawpa felfai khan lo inhmuak mah se, an fimkhurnain a veng zo bik lo. Hri a darh avangin kan zo hnahthlakte khawsakna, Churachandpur khawpui chu a reh hian a reh ṭhuap tawh mai a ni.

KAN LA VANNEI A NIH HI:

A ni chiah asin, he hripui hi kai hlauvin, mi tin fimkhur turin kan inchah, chuti chung chuan, inkai darh an pung hluai zel mai. Keini chu a kai kan neih chhun lah, Mizoram a lo thlen hmain, inrinhlelhna a rawn nei hman hlauh va, tumah kai darh lovin, amahin a tuar chhuak ta ṭhak mai. A bak chu kan la him chu a nih hi.

Haw runpui a lo thleng a, kan chhehvel state te chuan, inkaidarh nan an hman laiin, keini chu hetah pawh kan la him hlauh mai.Mite chuan, sap mikhual an neihte aṭangin an kai nawlh nawlh a, keini chu kan Chapchar kut mikhualte khan an rawn pu lut lo hlauhte kha, kan vannei hi a ni tawp mai.

I KHAW LAMAH

KIR LEH RAWH

An lo kir a ngai, red zone khawpuiah an cheng a, hripui hi an kai hlauh chuan, an khawngaihthlak lutuk dawn, an thih hlauh phei chuan, an chhungten an vâp bak hmuh tur an nei dawn lo, chutiang hun rapthlak tak chu a lo thlen hmain, dam lai hmel ngei an inhmuh hi a ṭul a ni.

Thihna em a thleng lo a nih pawhin, zirlaite tih loh chu, hripui leng avang hian, mi tam tak eizawnna a tawp tawh, an sum khawl sa an ring ngat ngat mai a, an ei zawh hma ngeiin an lo kir a ngai bawk.India ramah hian, Guwahati pelh tawh chuan, Mizoram awmna hre lo hi an tam lutuk, min hmu Chinese vek tawh mai, Chinese nih chu mi ṭih hlawhna a ni tawh si, an nun a chep lutuk, an lo kir vat a ngai.Lo kir tur hi an la ṭhahnem khawp mai, India red zone leh foreign red zone aṭangin an lo haw dawn, fimkhur sen lohna boruakin min rawn chîm dawn, kan la him thei zel ang em? 

KAN HIMNA LALPA

Mi thenkhat chuan, ṭawngṭai dái thêu neih te, ṭawngṭai ram mut neih te kha, eng vakah an ngai lo, fiamthu nante an hmang mai mai. Kan Pathian hi a nung a, thil a tithei a, himna min pe thei tih hi, i ring vek teh ang u.

Dik tak chuan hmachhuan tur dang hi kan nei lo asin, kan sum neih te, kan damna dawi neih te, kan mi thiam neih te hi, a bei tham lutuk. Mi ram angin hripui hi ṭaidarh ve se, kan buai nasat turzia mai chu. Chung chu a thlen ve lohna turin, "Hripui lakah ka veng ang che" ti theitu kan Pathian hi, rinna nung nen i au zel ang u.

I ṬAWNGṬAI ANG U: 

Aw khawngaihtu Pathian,

Lei leh van chunga thu neitu.

I anpuia I siam hring fate hi.

Eden bawhchhiat vanga lungngaihnate,

Thlaphanna leh thihna thleng pawh tuar tur ni mah ila,

I siam khawvela kan cham chhung hian,

Hripui leng avanga ruma kan awm ta hi.

Engvang nge, tu vang nge, tih kan zawt lo che.

Khawvel finna leh thiamna sang hle mah se,

He lei anchhe dawng ramah hian,

Mihring theihnain a dan rual loh,

Hri pui a lo thlen meuh chuan.

Aw, Chungnung ber, 

Nangmaha tluk luh mai loh chu,

Hring fate hian theih reng kan nei lo.

LALPA, kan ram riang tê phei hi chu.

Ram intodelh lo leh central chawm hlawm mai kan ni si,

Hri pui ni lo, hri te lek pawh lo leng se,

Buai chhiaa, phi ruai tawk lek kan nih hi.

LALPA, I humhimna tel lo chuan,

He hnam hian kan tuar zo ve dawn lo.

Kan khawsak phung hi han thlir la,

Ni tam daih ei tur nei lo,

Damna dawi hnianghnar nei lo,

Dap chawpa nung mai kan nih hi.

LALPA, he hnam tlawm tak hian,

Kan mangan apiangin Nang kan au che a,

I chhanna duhawm kan hmuh ṭhin kha.

Tunah pawh mangangin kan rum a.

LALPAN min veng rawh se tih chiah hi,

Kan inhumhimna awm chhun a ni mai.

Chuvangin aw Chungnung ber,

I hriat hnam Zofate hian,

Chhuan theih kan neih chu hei hi.

Chanchin Ṭha tuipui hnam kan ni asin.

Chu bak chu chhuan tur reng kan nei lo.

Kan nun I thlir a, I lung a awi lo tih kan hria.

HIV record siamtu kan ni miau a lawm.

Mahse aw LALPA kan ngen a che.

Kan sual tenawm tak hi min ngaidam la,

Chanchin Ṭha meichher chhi engtu atan,

He hnam hi min hmang zel ang che.

Chu meichher chhi eng tur chuan,

I humhimna chauh lo chu,

Beisei dang reng kan nei lo.

Chhandamna bangin kan ram hi rawn hung la,

He ram rethei riangvai tak hi,

Vengtu nei kan nih kan puan chhuah theih nan,

I Vantirhkohte rawn tir ang che. AMEN.