Zirna in hi hawn tawh tur a ni

School kal a hun tawh thu Sangi Pa thu ziak kha a ṭha ka ti. Mizorama zirna in hi hawn vek tawh ni se, Covid chu a kai tur turin kan kai tho ang a, zirna in kan khar reng chung pawhin India rama a kai tam ber (mipui zat aṭanga chhutin) kan nih tho avangin state dang pawhin zirna an kalpui tawh hi i kalpui ve tawh ang u.

Chhungkuaa awmte hi kan zavaia chhuak lova kan inhung ṭhap thei a nih chuan Covid lakah chuan kan him ṭha hle ang a, mahse chhungkuaah chhuak ṭhin kan awm chuan a chhuak ve lo te din­hmun kha a chhuak nen khan a inang reng tho a ni.

Naupangte school kal lovin kan khung a, mahse inah awm reng lovin naupang tam tak chu an leng thova, an school-ah chiah Covid kai kan hlau hi a dik lo.

College leh MZU pawh class kal a hun tawh a, i kal tawh ang u. Hmun dangah college leh university zirlai phei chu an chhuak tho tho a, kan hlauh dan em em hi kan thatchhiat vang te a ni zawk hial tawh lo maw?

A chhan chu state dangin zirna in an hawng tawh a, state dang aiin kan tlai char char a ni. Covid dona kawng­ah hi chuan ko kan thlak ngam hi huaisen tak hian a ṭul tawh a ni.

- Maremmawia