SIKUL I KAL TAWH ANG U
Covid hripui leng karah Champhai Dist.ah chuan District pumin February, 2022 aṭang khan zirna in te dan pangngaia hawngin OFFLINE in zirna kalpui a ni leh ta a. Ni tin hri kai hmuh chhuah tawk awm reng mah se naupangte hma khua ngaia huaisen taka sikul hawn thu petu DC Pi Maria CT Zuali hi a fakawm khawp mai.
Aizawl leh khaw tam takah chuan kum 2 dawn zirna in te khar a ni tawh a. A tuar ber chu naupangte an ni. He kum 2 chhunga an zir tur leh an thiam tur an hloh zawng zawng hi a man a tam hle ang a. A nghawng nat zia chu tunah ni lo, nakin hnuah a lang chiang leh zual ngei ang.
Covid-19 hian eng chen nge min tih buai dawn tih kan hre lo. He hri awm chhung zawng zirna in te kan khar dawn a nih chuan kan inkhar kum khua mai ang tih pawh hlauhawm tak a ni ta. Online class hian offline class a tluk thei lo va. Thingtlang hmun tam takah online class kalpui hleihtheih lohna a tam em em bawk. Hei vang hian huaisen taka thutlukna siam a, sikul hawna fimkhur theihtawpa dan pangngaia zirna kalpui leh mai hi thil ṭul tak niin a lang.
Kum 2 zet sikul khar takah chuan nuam ti ber chu zirtirtute an ni tih hi phat rual a awm lo a. Sawrkara sikula thawk, sikul kal loh pawha hlawh kiam chuang lo te hi nuam ti ber an ni a. Tam takin lo leh huan te neiin kawla ni chhuak chhiarin an feh thei a. Sikul khar kha an tan lawmna a ni mai.
Hun rei tak sikul kan khar hian zirtirtute moral nasa takin a tichhe tawh ni hialin a lang bawk. Hri hlauhawm lem lohna leh hri kai pawh awm mang lohnaa zirtirtute pawhin sikul kal an chak lem tawh lo a. Sikul chawlh theih dan ngawt an ngaihtuah ni maiin a lang a. Sawrkarin SOP a siamah "sikul hawn phal loh rawn ti se" tih hi an duh dan a ni deuh ta mai a. SOP in sikul kal phal lo se tih hi zirtirtu tam tak duh dan a ni ber.
Covid-19 hri leng karah pawh CAB ṭha taka zawm chung leh fimkhur takin sikul hi hawn theih dan a awm ang tih a rinawm a. Zirtirtuten an sikul dinhmun a zirin an sikulah ṭheuh ruahmanna ṭha tak an siam erawh a ṭul ngei ang a. DEO leh SDEO-te pawhin an bial chhung sikulte an vil uluk leh zuala an en zui erawh tih makmawh a ni ngei ang. Chutih rualin hri len hmaa kan nunphung pangngai leh kan awm dan anga awm erawh a theih tawh dawn loh tih hria ila. Working hours pawh a tlem phah deuh mai thei. Mahse, sikul chawlh ṭhuap ringawt ai chuan a ṭha zawk tho tho ang.
Hawh u, zirna in te hawngin fimkhur takin dan pangngaiin zirna i kalpui tawh ang u. Hri kai tawk kan awm a nih pawhin kar 1 vel an chawl anga an inkhung chhung a zawh hunah an rawn kal ve leh mai dawn alawm. Hnam ro hlu, nakin lawka kan ram hruaitu la ni mai tur, he hnam innghahna zirlai naupangte hmakhua ngaiin sikul hi hawng tawh mai ila. Huaisen taka hma lam panin ruahmanna fel tak hnuaiah fimkhur takin sikul i kal tawh ang u.
- Thansiama Teacher, Govt. Khawbung MS