Pawisa âtchilh kan sim a ngai a ni

"Tangka sum ngai­nat hi sual tinreng bul a ni," tih Bible-ah chiang takin a inzik chungin Mizote hian Bible lamin a do lem loh zu hi sual zawng zawng bulah kan han puh thlu ve ringawt zel hi kan tihsual lian tak a ni phawt a. 

Chu aia kan tih sual lian lehzual chu mi an ruih nut but but loh chuan pawisa chanchin ringawt an sawi an sawi pawhin, "Sualah a tlu tawh a nih hi," kan ti ngai miah lova, Bible kan bih chian loh vang pawh a ni theiin a rinawm ta a ni.

Chutichuan Mizo­ramah hian kan politician-te thusawi hi mahni phak ang tawk tawkin (kan phak tawk chu a sang lem lo tih chu a chiang a) ka lo zir chiang ve ṭhin a, kan hotupa ber kan Chief Minister thusawi hian pawisa hi a sawi lang nasa em em mai a. 

Tuna kan sum dinhmun hriat leh hriat loh, Covid leh vid loh vel hi kei chuan ka lo ngaihtuah ve lem lova, pawisa leh pawisa ringawt mai, sum leh sum chanchin inhrilh vak vak hian kan ram hi tangka sum ngainatna sualah a tlu thuk hle tih a lantir a ni.

Kohhran sawisel hi mi ṭhenkhat chuan Pathian sawiselna angah kan han puh hial ṭhin a, Martin Luther leh John Calvin-a zirtirna ringtu tamna Mizoramah hian Luther leh Calvin-te kha ringtu dik, Kohhran kal dik lo sawisel ngam an ni tih kan hre awm e. 

Kohhran sawi chhiat leh kohhran tih dik loh sawisel hi thil hrang daih a ni tih hriat phawt a ngai. Kan kohhranten sum an atchilh leh thawhlawm leh tangka an sawi ri zing ta lutuk pawh hi vei a ngai a ni. 

Miin Pathian hnena sawma pakhat a pek leh a lawm avanga a thawh ni lova phût chhuah thawhlawm leh thawhlawm tlem hlauhna hian kan kohhran hi zim buai tawh lo se a ṭha ang. 

Kan Minister zing­ah pawh hian pawisa, pawisa, pawisa mena meng ringawt mai hi an awm tlat mai. Thusawina apianga a department tana pawisa a sawi chhuah hnemzia, pawisa sum hmanga mipui darling nih tum hi kan kalsan a ngai a ni. 

Kan ram hian pawi­sa atchilhna avangin Chiahpuam sum leh Khehpuam sum pawh a hnar phal lova, hausakna chhui chian dawl lote pawh a chawimawi chho meka a lan tawh avangin "Tangka sum ngainat hi sual tinreng bul a ni," tih hi i hre nawn ang u khai.