INRENCHEM A TAKA A LAN A NGAI

Pu Zoramthanga, Mizoram Chief Minister chuan sum lamah sawr­karin harsatna a tawh mek thu a puang ta a, sawrkar hnathawkte pawh an hlawh bat sak an nih dawn thu chanchinbumite hmaah a puang ta hial a ni. 

Covid-19 avanga khawvel sum leh pai dinhmun tlahniam mek leh India sum dinhmun tlahniam mek aṭanga en pawhin Politics taka inbeih a lo in deusawhna chi pawh a ni lo. Mizoram Chief Minister, Finance changtu ni bawk hian sawi awm tak a sawi a, Mizoram hmasawnna thlen tir a tum dan leh Budget hailuh an tum dan nen thlir zawn phei chuan CM tan hian thil sawi hrehawm tak a nih a rinawm a, lo deusawh vel te phei chu thil ṭul lo tawpkhawk niin alang. 

Hetihrual hian sum lama inrenchem hi a lang pawh a kalpui a ngai tak meuh tih kan hriat tel a ngai a, kan sum dinhmun mil tawka kan chet velna pawh kan lantir thiam a ngai hle. 

Kan hriat ṭheuh angin kan ṭhenawm state-ah khawvel chawk buaitu Covid-19 vei an pung chho mek a, ramri ven hna pawh Mizoram Police leh Task Force lamin an bei ngawrh hle a ni. Ramri ven hi Mizoram mipui pawhin an ngai pawimawh a, sawrkar pawhin ramri ven a ngaih pawimawhzia a sawi mai ni lovin Mizoram Chief Minister ngei pawhin ramri duty te a tlawh ta hial a ni. 

Mizoram Chief Minister-in ramri a tlawh hi a lawmawm hle a, Mizo mipuite tan pawh a thlamuanawm hle ang. A ni bakah hian Minister ten ramri tlawh hun hi neih chhoh an tum mek niin sawi a ni bawk a, thil lawmawm tak a ni, a tih theih awm e. Hetiang a nih lai hian kan ram sum bawm dinhmun hre reng chunga chet lak erawh a ngai! 

VIP ramri tlawhtute hian kan ram sum dinhmun hi Pathian chauh lo chuan a hriat loh thu Finance lam changtu Mizoram Chief Minister-in a sawi kha an hriat reng a ngai hle. Tun dinhmunah chuan VIP zinkual hian official hruai duah te hi an dah ṭhat rih a ngai hle a. Party hruaitute hruai kual duah pawh hi sum inrenchem lai phei chuan tih loh ni se, lirthei inzui kawi nguai te hi thil inhmeh lo tak a ni tih an hriat hle a ngai.  Eiin thlengin a hautak hle tih hi ngaihtuah tel a ngai viau bawk. 

Mizoram sum din­hmun a tlakhniam tlat avangin VIP te leh an ṭhuihruaite ei tur lo siam hi Department lam tan pawh a hautak zual hle ang tih hi a chiang a, sawrkar hnathawkte hlawh pawh batsak ngai hial dinhmuna ding mek kan ni tih VIP te hi hrethiam tur an ni. 

Mi in hnuai luah chunga incheina chang­kang ber ber inbel ang chauh nih hi thil zahthlak a ni. Mizoram CM-in ramri a tlawh te hi a lawmawm hle a, chutihrual chuan Official an kal dul dul mai te kha a zialo hle a, kawng hrang hranga inrenchem a ngaihzia mipui hrilh an nih mek laia lirthei changkang ber ber nena ramri lama tawlh dul dul hi thil mawi leh zahawm a ni hek lo. 

Ramri a ni emaw ni lo emaw tun ang boruakah hi chuan VIP ten Official an hruai ṭeuh hi a hun lo a, inrenchem kan sawi lai a neihkehchet a che ang a kan lang hi a inrem hlawl lo a ni.