CM bula zanriah kiltu hi kan hre chiang duh

Abu Mazumdar, Assam sorkarin kuhva rah ro smuggling a inhnam­hnawiha an puh leh an zawn chu kan Chief Minister Pu Zoramthanga leh Assam Chief Minister ten New Delhi lama nikum November a zanriah an kilnaah a lo awm ve mauh mai le! He pa hi kan mi hriat ngai a ni lova, mahse Barak Bulletin lamin a rawn sawi takah chuan smuggler a nih hmel a, chu chuan New Delhi Mizoram House-ah kan Chief Minister a hmù a, hei hi thil nuai liam mai mai tur chi a ni ta hauh lo mai.

Barak Bulletin in a thlalak nen meuha an rawn tihchhuah danah chuan he Abu Mazumdar hi Mizoram CM team lama mi a ni a, CM pahnih inbiaknaah a awm thei a, hei hi thil namai lo tak a ni. MNF hruaitu dangte pawh an lan phak ve mang lohnaah Abu Mazumdar hi tu CM sawm emaw tak chu a ni tih a hriat mai.

Mizoram Chief Minister sàwm anga an chhuah chu an sawm a nih loh thuin Chief Minister's Office-in an han chhang nghal hmak a, a lawmawm hle a ni. Barak Bulletin hian kan CM tihmualpho an tumna lamah smuggler nena inthurual angin an rawn ziak ni ngei-ah kan ngai ta a ni.

Nimahsela MNF Party in thu chhuah an siamah khan he smuggler hian Mizoram House-ah MNF President leh kan Chief Minister hi a lo va hmù ngei a ni. Chu mi piah lamah chuan Mizoram House lama a kal hi Assam House lama thleng zawk tura an kawhhmuh thu hi MNF ngei hian an thuchhuahah an ziak lang.

Chuti a nih chuan Mizo­ram House-ah tlangnel taka CM hmù thei leh thlen pawh tum hial, mahse Assam House lama kal tura an lo kawhhmuh leh tâk chauh a ni.

Mizoram BJP-in thu tihchian duhin an chhui zui a. Assam Secretary leh MLA ni bawk chuan Abu Mazumdar hi Assam CM sàwm ni loin Mizoram CM sàwm a nih thu an sawi a ni. Assam CM Secretary sawi leh Mizoram CM Office sawi hi a inkalh chiah a, kan CM bula smuggler tlangnel tak anga lang leh CM OSD a bula awm ve ran hi Mizoram hian a nihna tak a hre duh a ni.

Kan CM Office nge Assam CM Secretary thu­sawi hi dik zawk? Myan­mar aṭanga kuhva tawlh ruk ni si, Police check gate an paltlang char char te pawh hi a chhan kan hre duh. Assam media thu hi kan pawm pawh a ni lova, mahse ngaih ṭhat lohna tur thil a tam em avang hian Mizoram BJP tal hian chhui chiang thei se a ṭha ang. Central YMA leh MKHC pawh inrawlh se thil dangah pawh an inrawlh tho si a.

- Lalchhuanawma